رواية رايت في قلبك عشقك لي كاملة جميع الفصول بقلم امنيه حاتم
قطعته في الكلام وقالت بثقه: انت عاوز تنهي كل حاجه بينا؟؟
محمود: هو انا لما ادافع عن نفسي يبقا عاوز انهي كل حاجه!!؟
بينا بالعكس انا بحافظ علي اللي بينا
ندا بهدوء: انت مش محتاج تتدافع عن نفسك لاني متقبله عيوبك قبل مميزاتك
انت بس محتاج تهدا شويه وبعد كده نتكلم
كنت واقفه مستغربه الموقف جداً إزاي هي هاديه وعندها ثبات انفاعلي كده ودي مش طبيعتها
وإزاي هو بيقول كل اللي جه في عقله منغير تفكير كتير وبرضو دي مش طبيعته
محمود بهدوء: شكرا إنك فهماني انا فعلا محتاج اهدا… تعالي اوصلك
رحمه بهزار: يعني انا دلوقتي احب الارتباط ولا اكره؟؟
محمود: انتي تحضري الغدا لحد ما اوصلها واجي
رحمه بضحك: اه دي فكره احسن برضو عشان جعانه
وصلها واتغدا ودخل الاوضه بتاعته في هدوء كده ومنغير ما يتكلم ويهزر ف عرفت ان فيه مشكله وكبيره كمان
رحمه: ممكن تحكيلي زي ما بحكيلك ولا هتفضل شايل كل حاجه لوحدك؟؟
محمود بحزن: هو الكلام هيحل حاجه؟؟
اتحفزت اوي اني اشجعه علشان يتكلم
رحمه بحماس: ده الكلام ده بيحل نص المشكله اصلا… انت ممكن تلاقي حل اللمشكله وانت بتتكلم كمان
محمود: ازاى ده بقا
رحمه: هو الدكتور النفسي لما بتروحله بيقولك احكيلي واتكلم عن كل اللي جواك صح؟
محمود: صح
رحمه: وبتوع التنميه الذاتيه واللايف كوتش بيقولو لما تكون عاوز تحل مشكله او ترتب تفكيرك اتكلم بصوت عالي وسمع نفسك واكتب علي ورق صح؟؟
محمود: صح برضو
رحمه: يبقا احكيلي بقا.. ما انا كل ما تحصل حاجه بقولك عليها قبل ما توصل البيت اصلا
محمود: كل ما اجي اخد خطوه في المشروع بتاعي تفشل رغم اني مخططلها كويس اوي
وكل ما اجي اعرض علي حد الفكره ميوافقش بسرعه رغم اني عندي ثقه في نفسي وفي كلامي
شعور الفشل وحش اوي وانا دايما كنت ناجح وبخطط ل كل حاجه وعامل كل اللي عليا
رحمه: هتصدقني لو قولتلك ان اللي انت بتقوله ده سبب حزنك وممكن يكون سبب للفشل اصلا وانه وهم ومش موجود في الواقع
محمود بإستغراب: انتي قصدك ايه
انا دايما ناجح وبواجه كل حاجه بقوه وصمود
رحمه بهدوء: مفيش حد دايما ناجح
مفيش حد بيمشي حياته بخططه وتدابيره بس
مفيش حد دايما قوي بدليل قول الله تعالي
(وَخُلِقَ الْإِنْسَانُ ضَعِيفًا )
ف خفف علي نفسك يا حبيبي… ربنا بس اللي حسيب وظافر وله تدبيراته ومعجزاته
احنا بنظلم نفسنا لما بنقول اننا اقويا ومش بنخاف وعندنا خطط والكلام ده كله
محمود: كلامك زود حيرتي يا رحمه
رحمه بإبتسامة: يعني لازم تقبل انك مش كل مره هتنجح
مش كل مره الخطه بتاعتك هتكون صح
لازم تكون متقبل انك شويه هتقوم وشويه هتقع
وبعدين انت اعمل اللي عليك وخد بالاسباب وسيب كل حاجه بعد كده علي ربنا وسبحانه هيرتبلك كل الامور بمشيئته وانت اتقبل كل حاجه بقلب مطمن… انت بتخطط علي قد معرفتك وعلمك لكن ربنا عليم وحكيم ف متزعلش لما حاجه متكملش او متنجحش من اول مره
محمود بإبتسامة: انتي امته بقيتي عاقله كده وبتقولي كلام يطمن؟؟!
رحمه بهزار: والله انا بقول حكم بس انتو اللي مش بتقدور قيمتي في البيت ده
محمود: يعني في الاخر طلعنا احنا اللي غلطانين!!
رحمه بضحك: ااااه
بس في حاجه بقا عاوزه اسألك عليها ومش عارفه اسكت بصراحه
محمود: خير يارب
رحمه: انت إزاي اتكلمت مع ندا كده وقولت الافكار اللي جت في دماغك ومقلقتش انها ممكن تزعل مثلا
محمود بإبتسامة: تعرفي اني بحب وقت الاختلاف والمشاكل مع ندا اوي؟؟
رحمه بإستغراب: نعم؟؟
محمود: بجد والله… علشان بحس إني اختارت صح…. اختارت اللي اعرف اختلف معاها وانا مش خايف اتفهم غلط او انها تهدم كل علاقتنا في لحظه انفعال
رحمه: انا مفكرتش في الموضوع ده قبل كده
محمود: ده وقت المشاكل اهم من وقت الصَفا اصلا… علشان وقت الصفا والضحك كلنا بنكون حلوين لكن مش كلنا بنكون حلوين وقت المشاكل
رحمه: طب لما هي بتكون متعصبه انت بتستحملها برضو
محمود: اه طبعا
بسيبها تتطلع كل افكارها اللي هي زعلانه منها او خايفه منها
علشان اقدر افهم هي زعلانه من ايه وعلشان اقدر اطمنها…. وعلشان مسيبهاش ل افكار ممكن تموت كل حاجه حلوه بينا
رحمه: انا مبسوطه بعلاقتكم اوي
محمود: طب انتي عارفه الاختلاف بتاع انهارده ده خلص بسرعه ليه
رحمه بفضول: ليه وإزاي؟؟
محمود: هما جملتين اتقالو قدامك شالو زعل وخوف كل واحد فينا
رحمه بتفكير: جملتين؟؟؟
ايه هما
محمود: هي قالتلي اني مش محتاج ادفع عن نفسي لانها متقبله كل عيبوبي قبل مميزاتي كمان
ف انا اطمنت
وانا قولتلها اني عاوز احافظ علي اللي بينا ف هي اطمنت اني لسه ماسك فيها… شوفتي التفاهم حلو إزاي
رحمه بهزار: قاعده مع اسامه منير يا ناس
محمود بهزار: حاجه في الرينچ ده
رحمه: والله انا قولت اخويا فيه بذره رومانسيه محدش صدقني
محمود: بمناسبه البذر بقا
انتي كلتي المانجا كلها وسايبه البذر في الطبق يا روح خالتك
رحمه بضحك: ايوه يا ماما يا حبيبتي انا جايلك اهو
محمود: اهربي اهربي هتروحي مني فين يعني
_____________________________________
رحمه: ماما انا هنزل اتمشي شويه
هاله: لأ مش وقته
رحمه بزهق: ليه بقا
هاله: هدي هتيجي تقعد معايا شويه علشان ابنها مسافر واحتمال زين يجي معاها
رحمه: طب انا مالي اقعد ليه و….
ايه ده زين هيجي معاها
هاله: بقول احتمال
رحمه: حيث كده بقا ادخل البس طقم حلو
هاله: اشمعنا؟؟
رحمه: علشان عندنا ضيوف ولازم اشرفك طبعا
هاله: مش مرتاحالك علي فكره
رحمه بهزار: انا نيتي خير والله
عادي انا قولت البس طقم حلو علشان المره اللى فاتت شافني بطقم كله اسود وبالنسبه ل ماما اسمه طقم(اللي جوزها مات في الحرب)
جم علي الساعه 6 يعني فاضل نص ساعه تقريبا ومحمود يجي ولحسن الحظ زين وصلها وطلع معاها ف قدمت العصير وقعدت انا كمان
زين: علي فكره انا بعرف اركن بس المره اللي فاتت العربيه اللي تحت البيت كانت راكنه غلط
رحمه بكسوف: هي طنط قالتلك انا قولت ايه؟؟
زين: قولتي اني مش بعرف اركن
رحمه: طب الحمدلله
زين: قوليلي انتي خريجه إيه؟
رحمه: تجارة ومعايا كورسات كمان
زين: طيب كويس جدا… نزلتي تدريب قبل كده
رحمه: لا
زين: طب فكرتي تشتغلي
وقبل ما ارد ماما سمعت السؤال وقررت ترد هي
هاله: مين دي اللي تشتغل!!!
دي بتقوم العصر يا ابني
رحمه: احم احم عادي بس فيه ايام بقوم بدري
زين: طب ما تستغلي وقت فراغك وتعملي حاجه تفيدك وتزودلك خبره
رحمه: والله فكره حلوه… بس تفتكر ممكن القي شغل بسرعه؟؟
زين: انتي جربتي تتدوري قبل كده؟؟
وللمره التانيه ماما بترد وتستعرض قدراتي الرهيبه
هاله بضحك: مين دي اللي تدور علي شغل!!!
دي بتفرهد من الحر وبتتعب من البرد هتشتغل امته بقا!!
هدي بهزار: يعني هي بتتأقلم مع الربيع بس!!
انا بضحك من برا بس من جوايا بقول ماشي يا ماما علي برسيتيچي اللي بقا في الارض ده وشوفي مين هيخلص المواعين بليل
رحمه بثقه: علي فكره انا لو عاوزه اشتغل هعرف اصحي بدري وهقدر انزل في الحر والبرد
بس طالما ملقتش حاجه تستاهل تعبي ومجهودي ف بريح نفسي
زين: طب واللي يجبلك شغل كويس جدا وبمرتب معقول ويخليكي تثبتليهم إنك تعرفي اي حاجه في اي وقت تقوليله إيه!!؟
رحمه: اشكره جدا طبعاً… بس فين الشغل ده
زين: انا شغال في شركه استيراد وتصدير وعاوزين ناس في الحسابات ف إيه رأيك تنزلي تجربي جو الشغل؟؟
رحمه بتفكير: هيقبلو اني معنديش خبره
زين: مليكش دعوه بالنقطه دي
المهم انك تشتغلي علي نفسك كويس وتاخدي الخبره بقا
رحمه: هو عرض حلو بصراحه
زين: لازم يكون عندك هدف وشغف وطموح والشغل هو اللي هيعمل كل ده وهيخلي يومك مختلف
حسيت بتشجيع وتحفيز كبير ف رديت بسرعه: خلاص وانا مواقفه… وطبعا انتي موافقه يا ماما صح؟؟
هاله: اه موافقه وهكلم محمود في الموضوع ده
انا قولت مش هخسر حاجه لو جربت وبصراحه فرحت اوي انه اهتم اني اشتغل وكمان ساعتها هشوفه كتير وهعرفه اكتر و وماما كلمت محمود وهو معترضتش أوي لكن الشركه مش بيعيده وكمان حاجه في نفس تخصصي
اول يوم في الشغل كان حلو اوي واتعرفت علي طبيعه الشغل والناس اللي هتكون معايا وكنت مبسوطه
رحمه: مااااامااا انا جيييت وجعاااانه
كريم: العماره كلها عرفت إنك جعانه مش طنط بس
محمود بضحك: تحس انها اول يوم في المدرسه مش اول يوم في الشغل
كريم: ايه ده ايه ده رحمه قررت تشتغل
استوعبت الكسفه اللي حصلت واتكلمت بثقه عاادي جدا ولاكأن حصل حاجه
رحمه: ومشتغلش ليه بقا إن شاءلله!!
كريم: يمكن علشان انتي بتحبي البيت والروقان والرسم اكتر من الزحمه والفرهده والتعب!!
رحمه: بس انا المفروض يكون عندي شغف وهدف وطموح والشغل هو اللي بيعمل دول
كريم: بذمتك انتي مقتنعه بالكلام ده!!
محمود: هو انتو لسه طريقتكم مع بعض متغيرتش رغم السنين اللي فاتت دي!!
رحمه: انا مقتنعه ب الكلام اللي بقوله
كريم: بس ده مش كلام شخصيه رحمه علي فكره
رحمه بعناد: محدش بيفضل زي ماهو وكلنا بنتغير علي فكره
كريم: يعني انتي حابه الشغل
رحمه: اااه وجدا كمان
كريم: لما نشوف رأيك هيفضل زي ماهو كمان شهرين ولا لأ
بصيتله برخامه واضايقت من كلامه وقولت في سري: يارب الكلب اللي تحت ده يعضك علشان متجيش عندنا تاني
او يعض لسانك علشان متتكلمش تاني
كريم بهزار: انا سامعك ومش مسامحك هاااا
محمود: علي فكره يا رحمه محمود جاي علشان يقول خبرين واحد حلو وواحد وحش
كريم:…………
يتبع..
حمود: علي فكره يا رحمه محمود جاي علشان يقول خبرين واحد حلو وواحد وحش
رحمه: طب ابدء بالحلو
محمود: محمود قرر يخطب وجاي يقولنا ويفرحنا معاه بس الخطوبه هتكون عائليه بس
مكنتش عارفه افرح ولا استغرب بس عرفت اتحكم في رد فعل ملامحي وابتسمت بسعاده
رحمه: حلو الخبر ده مبروك يا كريم اخيراً هتستقر
كريم: اه انا تعبت من السفر البهدله وعاوز ارتاح شويه
رحمه بعدم اهتمام لكلامه: طب وايه الخبر الوحش
كريم: ان ماما تعبانه شويه والضغط والسكر مش مظبوطين عندها وكمان هي بقت قاعده لوحدها بعد جواز إسراء وانا برتب شغلي هنا ومش فاضي
رحمه: الف سلامه عليها، طيب مفيش حد يقعد معاها
محمود: ماما أول ما عرفت قامت تحضر شنطها اصلا علشان هتروح مع كريم
رحمه بصدمه: نعم؟؟
بصولي ب إستغراب ف كملت كلامي: قصدي يعني ماما هتقعد هناك كتير؟؟
كريم بضحك: طب وايه المشكله ما انتي كبيره اهو وتعرفي تعتمدي علي نفسك
محمود: هرد علي ندا واشوف ماما هتحتاج حاجه ولا لأ لحد ما تخلصو خناق مع بعض
رحمه: هو انت مبتعرفش تفرق بين اني بحب أمي وبين إني معرفش اعتمد علي نفسي؟؟
كريم: قصدك إيه؟؟
رحمه: قصدي إنك سطحي اوي يا كريم وده من زمان علي فكره
من اول ما كنت بتقولي إني مش هقدر انجح بتقدير في الكليه بتاعتي علشان صعبه وانا مليش في الرياضه اوي
كريم: طب ما ده كان حقيقي
رحمه: لأ مش حقيقي لاني كنت بنجح كل سنه وبتقدير كمان
وبرضو كنت بتقولي اني مش ناجحه في حاجه غير الرسم ومليش مواهب تانيه وان محاولش اجرب حاجه علشان هفشل
كريم بتوتر: انا كان قصدي إنك موهوبه في الرسم ودي حاجه حلوه ومش شرط يكون ليكي هويات تانيه
رحمه بثقه: بس انا طلع عندي هوايات تانيه واتعلمت اخرج طاقتي في الرياضه وتقبلت اني مش لازم يكون عندي عشر هوايا ولا عشرين حاجه اعملها وقت فراغي…. كفايه اني بقدر اقعد مع نفسي وانا مبسوطه ومرتاحه البال
كريم: انتي عاوزه توصلي ل اية من كلامك يا رحمه!!
رحمه: عاوزه اقولك إنك فضلت 3 سنين بتحبط فيا وبتقولي اني مبعرفش اعمل حاجه وصعب اجرب حاجه جديده بس كل ده طلع وهم
كريم: ده انتي طلعتي زعلانه مني من زمان
رحمه: انا لو هزعل علي حاجه هزعل اني كنت بصدق كلامك واقعد افكر بليل انا ليه مش بقدر اعمل حاجات مختلفه او حتي الحاجات اللي انت كنت بتقولها زي التصوير والشعر وحب الكتب
رغم اني لو كنت فكرت شويه كنت هلاقي اني متميزه برضو في حاجات تانيه انت مبتعرفش تعملها
كريم بإحراج: انا مكنش اقصدي تفهمي كلامي كده
رحمه: هو مكنش ليه معني غير كده
بس انا عاوزه اقولك شكراً
كريم: علي ايه بقا ده طلعت سبب في جلد ذاتك كل يوم
رحمه: جلد الذات ده اتحول ل تفكير في قدرتي واللى اقدر اعمله بجد واللي مبحبش اعمله
كل واحد فينا عنده قدرات ومتميز في حاجات مختلفه
مش علشان انا محبتش كتاب معين مثلا اني مش مثقفه ومبفهمش في الكتب
لكن ممكن اكون بحب اسلوب وطريقه سرد المعلومه ل كاتب تاني
“لولا اختلاف الأذواق ل بارت السلع”
كريم بإبتسامة: كنت غلطان لما قولت إنك متغيرتيش… انتي اختلفتي تماماً اصلا
رحمه: وانا ارتحت جدا دلوقتي إني قولتلك كل الكلام اللي كنت بفكر فيه وكان بيشغل تفكيري زمان
واقدر اقولك دلوقتي بكل فرحه بجد مبروك يا ابن عمي
“كل الذين يكتمون وجعهم وحزنهم بإتقان، ينفجرون كالسيل إذا باحوا ولن يصمتو حتي يفرغو كل ما بداخلهم من افكار وحيره وحزن ثم يهدئو ويبتسمو من جديد”
____________________________________
محمود: دلوقتي ماما مشيت والبيت فضي علينا يا سيندريلا
رحمه: طب علشان سيندريلا دي هقوم اعملك فشار ونسكافيه
محمود بهزار: ده ايه الرضا ده كله
رحمه بضحك: اصل الغزاله رايقه
اليوم كان جميل ورغم ان نوادر ان ماما متنكنش في البيت بس قررت إني لازم اعتمد علي نفسي في النقطه دي وان هيجي اكيد وقت واسيبها
نمت من كتر الارهاق وصحيت علي المنبه الساعه 9
رحمه: نهارسوح ده انا المفروض اكون لبست دلوقتي وكمان محمود مصحنيش معاها ليه
قومت بسرعه وانا معديه من قصاد الاوضه بتاعته لقيته نايم
رحمه: انت كمان لسه نايم؟؟
محمود محموووووود قوم بسرعه
محمود بخضه: ايه في ايه!!
البيت بيولع؟؟؟ السخان فرقع؟؟؟
رحمه: ياعم بعد الشر
بس الساعه 9
محمود بنوم: ايوه يعني اعمل ايه دلوقتي
رحمه: يابني شغلك انت نسيته ولا ايه؟؟
محمود: روحي ياشيخه النوم يطير من عينك ومتعرفيش تنامي طول اليوم
رحمه: يعني انا غلطانه اني بصحيك!!!
رد عليا وهو بيحدف كل المخدات في وشي: انهارده الجمعه يا هانم
انهارده الجمعه يا استاذه
رحمه: ياااااه ده نسيت معلش معلش
محمود: انام ازاي انا دلوقتي بقا!!
بصي اختفي من وشي
رحمه: والله خاسره فيك فشار بليل
بعد كل الدوشه اللي عملها دي رجع نام تاني عاادي جدا وانا كمان دخلت نمت وصحينا متأخر واكلنا وهو دخل يخلص شغل علي الاب توب بتاعه
محمود: رحمه
رحمه:………..
محمود: يا رورو
رحمه: دلوقتي بقيت رورو والصبح كنت هتولع فيا
محمود: ما برضو مفيش حد بيصحي حد بالطريقة دي
رحمه: هعديهالك المره دي
محمود: طول عمرك طيبه وحنينه
رحمه بهزار: بدءت اقلق
محمود: طب انتي هعتملي اكل ايه انهارده؟؟
رحمه بحماس: هعملك مكرونه بشاميل
محمود: لا وحياه اغلي حاجه عندك انا مش عاوز اعمل غسيل معده
رحمه: انا عملت قبل كده حاجه وحشه او اتحرقت؟؟
محمود: اااه كتييييير
رحمه بضحك: طب ما دي مش اول مره قلقان ليه بقا
محمود: انتي بتجربي فيا!!!
رحمه: اومال اجرب في حد غريب؟؟
محمود: تصدقي عندك حق
انا قررت اكل مكرونه بشاميل انهارده
رحمه: هو ده اخويا الشجاع
دخلت وحضرت المكونات وركزت في كل حاجه غلط عملتها قبل كده عشان المره دي تطلع حلوه
رحمه: ومش هنسلق المكرونه اوي يا بنات و هجاوب معاكم علي اي اسئله
محمود دخل براحه وبيبصلي بإستغراب: بتكلمي مين يا حبيبتي
رحمه: بكلم نفسي
محمود: ايه يابت الثقه دي كأنك بتعملي حاجه عاديه وانا اللى مجنون
رحمه بضحك: ما انا مش عارفه انت مستغرب ليه بجد، انا بحب اكلم نفسي وانا بعمل اكل كأني شيف في برنامج وكده
محمود: ياااه علي العقل والنضج يا ناس
رحمه: اصلا نص البنات بتعمل كده
محمود: الله اكبر
هو المفروض جوزك المستقبلي يمضي علي قايمه صح؟
رحمه: صح
محمود: وهو هيمضيكي علي ورقه انه متجوزك وهو بكامل قواه العقليه علشان لو حصله حاجه تبقي انتي السبب
رحمه بضحك: يابني ده انا نسمه فراشه كده في البيت
محمود بضحك: علي ييييدي
بعد ساعه
رحمه: محموووود تعالي بسرعه
محمود: فيه ايه
رحمه بغرور: تعال دوق العظمه يابني
محمود: هي شكلها حلو
بس ربنا يستر
اخد معلقه صغيره ومتكلمش بعد كده اخد معلقه كبيره
رحمه: انت هتقول رأيك لما تخلص الصنيه ولا ايه!!
محمود: بصراحه حلوووه اووي ومتوقعتش انها تبقا بالجمال ده
رحمه بفرحه: والله انت اللي جميل وحبيبي ومحدش بيشجعني غيرك
محمود: هاتي بقا العظمه دي وتعالي
تقريبا كنت طول اليوم مبسوطه بسبب الكلمتين دول… كلام التشجيع سهل ومش محتاج مجهود لكن تاثيره بيكون كبير جدا في قلوبنا
الايام اللي بعدها كنت بنزل الشغل وبكلم ماما اطمن عليها وبرضو اليوم مكنيش بيخلي من خناقتنا وضحكنا مع بعض
_____________________________________
زين: صباح الخير
رحمه: صباح النور… انا خلصت الورق ده
وخلصت الحسابات بتاعت امبارح وسلمتها و….
زين بإبتسامة: براحه براحه
انا عارف إنك شغاله كويس جدا ومش جاي بخصوص الورق والشغل
رحمه: اومال جاي ليه
زين بهزار: يعني مينفعش اجي اطمن عليكي مثلا
اكتشفت اني حرجته شويه ف ابتسمت وقولت اكون لطيفه شويه
رحمه: مش قصدي طبعا… حضرتك تيجي المكتب في اي وقت
زين: بصراحه انا مكنتش متوقع منك الالتزام ده وانك تفهمي الشغل بسرعه كده
رحمه: قولتلك قبل كده اني لما بحط حاجه في دماغي بعملها
قبل ما اكمل كلامي دخلت ريم علشان تسأله علي حاجه
ريم بإبتسامة عريضه: انا خلصت الورق ده يا استاذ زين وعملت كل التعديلات اللي حضرتك قولتلي عليها واتمني يكون صح المره دي
زين بإبتسامه: كويس جدا هاتيه وانا هراجعه
قبل ما يلف ويكلمني اخدت بالي ان وشي واخد رد الفعل اللي لساني عاوز يقوله ف عدلت ملامحي بسرعه وابتسمت بمجامله
زين: ايه رأيك اعزمك علي الغدا انهارده
رحمه: ليه؟؟
زين: عاوز اتكلم معاكي في موضوع
وقبل ما ارد عليه لقيت ندا بترن ف رديت عليها لانها رنت اكتر من مره
ندا: الحقي محمود يا رحمه
رحمه:…………
يتبع..
رحمه دا: الحقي محمود يا رحمه
رحمه بخوف: في ايه؟؟ حصله ايه؟؟
ندا بعياط: محمود عمل حادثه وهو دلوقتي في المستشفى
رحمه بخضه: طب اهدي اهدي انا جايه حالا
زين: حصل ايه؟؟
رحمه بإستعجال: محمود عمل حادثة ومش عارفه حصله ايه ولازم امشي دلوقتي
زين: طب يلا هوصلك
ركبت العربيه وانا قلقانه وخايفه ومتوقعه 100 سناريو وخصوصا انه بيسوق بسرعه وتهور بس بحاول اهدي نفسي شويه
رحمه: بإذن الله خير وهتكون حاجه بسيطه وهيقوم منها سليم
زين: بأذن الله متقلقيش
رحمه بتوتر: اه هو ممكن يكون جزع مثلا او دماغه اتعورت وهيكون كويس صح؟؟
زين: صح كده خليكي متفائله ومتخافيش
فضلت اخد شهيق وزفير واهدي ضربات قلبي اللي حاسه انه هيتخلع من مكانه بس مقدرتش وعيط جامد
زين بإستغراب: بالله عليكي اهدي ما انتي كنتي كويسه دلوقتي
رحمه بعياط: لا لا انا خايفه علي اخويا، انا مليش حد غيره في الدنيا
زين: صلي على النبي كده واهدي وهو هيكون كويس
رحمه بدموع: عليه الصلاة والسلام
ياتري ارتاجج في المخ ولا كسر ولا حصله ايه
يارب احميه يارب
زين: إيه التشاؤم ده احنا احنا أصلا منعرفش حصله ايه…. راحت فين الإجابيه اللي كانت من دقيقتين
رحمة: بلا إجابيه بلا نيله انا خايفة علي اخويا
وبعدين زود السرعه شويه
زين: طب……
رحمه: لا لا متزودش اوي علشان بخاف
زين: يابنتي اديني فرصه اتكلم… اقول اي حاجه حتي
رحمه: خلاص متقولش حاجه المستشفي اهي
انا هنزل وانت اركن براحتك وتعالي
دخلت الاتسقبال وسألت علي اسمه ودخلت الاوضه
كان نايم علي السرير وراسه مربوطه بشاش
رحمه بعياط: يالهوي انت فقدت الذاكرة؟؟
ولا دماغك حصلها إيه
محمود: بس بس انا اتعورت وجابوني هنا استريح وكمان علشان يعملو تحقيق
رحمه: تحقيق ليه انت؟؟ اوعي تقولي مو، ت حد بالعربيه
محمود: يخرب بيت الافكار دي ياشيخه
رحمه: طب فهمني حصل ايه
محمود: انا كنت واقف وبالعربيه وفيه واحد جاي بسرعه و خبط فيا وانا دماغي اتفتحت وهو دراعه اتكسر والتحقيق ده اجرء روتيني وهو هيقول ان هو اللي غلطان بس كده
رحمه بإرتياح: الحمدلله
دخل زين وسلم علي محمود واطمن عليه
زين: الحمدلله انها جت سليمه
رحمه كانت قلقانه اوي عليك
محمود بإبتسامة: هي مبتستحملش تسمع ان اي حد تعبان او حصله حاجه
قلبها جميل زيها
ايه ده ايه ده!!! هو محمود بيتكلم عني بحنيه كده ليه؟؟ هي الناس لما بتتعب بتقول كلام حلو كده؟؟
زين بإبتسامة: ربنا يخليكم لبعض
محمود جه وندا وماما ف زين استأءن علشان يمشي
زين: طيب انا لازم امشى علشان عندى شغل مهم
هاله: تعبناك معانا يا ابني
زين: لا مفيش تعب ولا حاجة يا طنط وحمدالله على سلامته
خرجت معاها من الاوضه وشكرته
زين: خلي بالك من نفسك وطمنيني عليه ولو عاوزتي حاجه كلميني
خرجت معاها من الاوضه وشكرته
رحمه: حاضر
زين بهزار: طب انتي معاكي رقمي اصلا؟؟
رحمه: بصراحه لأ
بس معايا رقم الشغل
زين: طب هاتي اسجلك رقمي الخاص
سجل رقمه ورن علي نفسه وأدنى التليفون ومشي ولا كأن حصل حاجه
طبعا ماما عرفت وجت مع مرات عمي وكلنا مشينا بليل بعد ما كل الاجرات خلصت وهو الحمدلله كان كويس
علي الساعه 10 بليل ليقته بيتصل
زين: عارف انك صاحيه ف قولت اطمن علي محمود
رحمه بإبتسامة: محمود كويس الحمدلله
زين: طيب وانتي كويسه؟؟
رحمه: اه الحمدلله
انا كنت قلقانه شويه بس
زين: شويه؟؟؟!
ده انتي عيطي مره واحده ولاكأني خطفك او هعذبك
رحمه بهزار: اومال اكتم في نفسي يعني؟!
زين بضحك: لا عيطي براحتك طبعاً
انا بس استغربت من التحول اللي حصل
رحمه: لا عادي اهلي متعودين علي كده
كل شويه بحال مختلف
زين: بس في كل احوالك جميله
رحمه: طب انا هقفل بقا علشان اشوف ماما ممكن تكون عاوزه حاجه
زين بضحك: طيب علي العموم خليكي مع مامتك بكرا ومش لازم تيجي
رحمه: يعني مش هيحصل مشكله
زين: لا مش هيحصل حاجه
وبعدين انتي مخلصه شغلك كله ف مفيش ورق هيتعطل
رحمه: طب كويس جدا
شكرا يا زين
زين بهزار: قومي شوفي مامتك اللي بتنادي عليكي بسرعه بقا
______________________________________
ماما نامت بدري وانا قعدت اتفرج علي المسلسل ف لقيت زين بيرن
زين: علي لو جيتي بكرا متأخر هيحصل ايه؟!
رحمه: هيحصل إيه
زين بهزار: معرفش والله انا مش مدير الشركه
رحمه: اه صح حكايه مدير الشركه اللي بيهدد الموظفين دي بتكون في الروايات بس
زين: اه ويكون قاسي والموظفين ييخافو منه وقاسي وقليل الذوق وبارد وفيه كل الصفات اللي مطتقش وتروح البطله تقع في حبه وتبدء رحله العذاب صح؟؟؟؟
رحمه بإستغراب: انا عندي خواتي البنات مش بيتكلمو في حاجه غير ابطال الروايات
رحمه بضحك: اه علشان كده عرفت الحاجات دي
زين: اه بنبقا قاعدين في امان الله
وفجاءه كل واحده تتكلم عن بطل الروايه اللي مفيش في قساوته وعنفه وصوته العالي اللي بيجيب اخر الاقصر
رحمه: بس علي فكره احنا في الواقع مش بنحب الشخصيه دي
زين: اومال بتحبوها في خيالكم وتحلمو بيها ليه؟
رحمه: ولا حتي بنحلم بيها في خايلنا
احنا بنحلم نتعامل زي الاميرات بكل ذوق واحترام وحنيه…. كل واحده فينا سيندريلا ومستنيه الامير اللي يقدر قيمتها ويعاملها بكل تقدير وحب وخوف علي زعلها
زين: وانتي شايفه ان الامير ده مش خيال؟؟
رحمه: طالما الموده والرحمه موجوده و طالما الدين والاخلاق موجوده ف السندريلا موجوده والامير موجود
زين بإبتسامة: بصراحه عندك حق
طب عارفه لو جيتي بكرا بدري هيحصل ايه؟
رحمه بإبتسامة: هيحصل ايه؟
زين: هعزمك علي احلي ايس كوفي
رحمه بضحك: ده انا هقوم انام دلوقتي حالاً
قفلت معاها وانا عندي شعور حلو كده بس مفكرتش كتير ونمت فعلاً وصحيت بدري صليت وجهزت ونزلت الشغل
زين: ايه الناس النشيطه دي
رحمه بهزار: استرونج ومن بقا
زين: يبقا تستاهلي الايس كوفي بقا
رحمه: انا بقول كده برضو
كلامنا كتر شويه… او شويتين وكل مره نتكلم في حاجه مختلفه وكل مره بكتشف فيه صفه جديده
زي انه بيسمع اللي قدامه لحد ما يخلص كلامه
مش ببتعصب بسرعه…. مش بيضايق من تغيري المفاجئ من الضحك للجد والعكس برضو
ومرن اوي في المناقشه وبيمشي بمدء يا تقنعيني يا اقنعك بكل هدوء كمان
كلامنا بقا يومي سواء بحاجه ضروريه او مش ضروريه بس بقيت عارفه انه هيكلمني او هشوفه في الشغل وفجاءه بقا واخد وقت لطيف اوي في يومي
زين: عمتي عندكم انهارده علي فكره
رحمه: اه ماما قالتلي
زين: تيجي اوصلك وتعزميني علي قهوه عندكم
رحمه بغرور مصتنع: اصلا اصلا انا احسن واحده تعمل قهوه
زين بهزار: طب يلا لما نشوف اخر التواضع ده إيه
زين: اشغلك حاجه تسمعيها مع شويه الهوا دول؟؟
رحمه: ياااه لو اصحي القي الشتا جت يااااه
زين بهزار: هتيجي وهتجمدي من التلج في الشارع
رحمه: انا اعيش 100 سنه في الشتا والتلج ومعقدش يوم واحد في الحر والفرهده
زين: طب اشغلك إيه؟؟
رحمه: هعمل اختبار ل ذوقك الموسيقي بقا
زين بضحك: وانا جاهز
رحمه: شغل اغنيه تعبر بيه عن نفسك دلوقتي
لقيته ابتسم ابتسامه حلوه كده وبص قدامه وشغل الاغنيه دي: “يامن هواه أعزه وأذلنى ،كيف السبيل إلى وصالك دلني ”
حسيت بدقه قلب غريبه كده وابتسمت تلاقئي ومعرفتش اتكلم تاني وهو مبتسم ومركز في الطريق ومتكلمش
“إنَ البهجة التي يخلقها وجودك بجانبي، تجعلني أنتظر شمس كل يوم ل استقبل فرحه جديده”
زين: ممكن السيندريلا تفضي نفسها شويه علشان اتكلم معاها
رحمه بهزار: ده اسمه إستغلال وقت العمل علي فكره
زين: عادي مش مهم اي حاجه دلوقتي
رحمه: طب انا سمعاك اهو وفضيت نفسي
اخد نفس عميق وابتسمت وبصلي بتركيز: عندك مانع اني اتقدم واخطبك
رحمه: اه عندي مانع
يتبع..
زين بإبتسامة: عندك مانع اني اتقدم واخطبك
رحمه : اه عندي مانع
زين بإستغراب: إيه هو المانع؟
رحمه: اسباب شخصية
زين: طب ممكن اعرف جزء منها
اخدت نفس عميق رديت بهدوء: انا مش مستعده نفسياً الارتباط
مش هتقبل حد يكون في حياتي… انا مش حاسه ان ناقصني حاجه
زين: انتي شايفه إن دي أسباب كافيه انك ترفضيني بيها او ترفضي اي حد يتقدملك!!!
رحمه بعناد: اه دي اسباب كافيه بنسبالي
لازم امشي دلوقتي بعد اذنك
“مش علشان هو مناسب او وسيم وعنده شغل يبقا هقبل واقول انه ميتعوضش
لأن اللي ميتعوضتش بجد هو سلامي النفسي، الهدوء وراحه البال اللي اخيراً اتمتعت بيهم..
مش هقدر اغامر وادخله حياتي وارجع من نقطه الصفر تاني”
____________________________________
هاله: رحمه تعالي عاوزه اتكلم معاكي شويه
جه في بالي انها هتكلمني عن موضوع زين وازاي ارفضه وخصوصا انه قريب صاحبتها اللي بتحبها
واني دايما باخد قررارت مستعجله وجهزت الكلام اللي هرد بيه عليها….
رحمه: اتفضلي يا ماما انا سمعاكي
هاله: انتي مبسوطه ومرتاحه في الشغل؟؟
رحمه بعدم فهم: يعني ايه
هاله: يعني انتي بجد حابه الشغل ولا واخده الموضوع ك تحدي وعند
انا اهم حاجه عندي راحتك يا حبيبتي
مكنتش متوقعه انه هتكلمني عن الشغل ولا كنت متوقعه النبره الحنينه دي في الكلام ف مكنتش عارفه ارد ولا اظهر اي رد فعل ف مسكت ايدها وقربت منها
رحمه بإبتسامة: انا مش تعبانه في الشغل
ومبسوطه بالخبره الجديده اللي بخدها والناس اللي بتعرف عليهم….. اطمني
طبطبت عليا وفضلت ساكته وبعد كده سألتني علي غدا بكرا وفضلنا نتكلم شويه وبعد كده دخلت تنام
تاني يوم صحيت بدري ونزلت الشغل وحاولت مشوفش زين واتعامل عادي
لكن المفاجأه بقا ان هو اللي بيتعامل عادي
وعادي جدا كمان
دخل الاوضه اللي فيها كذا مكتب ومنهم المكتب بتاعي
زين بهزار: صباح الخير يا شباب
عاوزكم تشدو حيلكم شويه علشان نقفل شغل الشهر ده بدري علشان اللي عاوز ياخد اجازه ياخدها
انس بهزار: ياريت والله عاوزه الحق البحر
زين بضحك: متخافش هتحلقه قبل ما يقفل
وهترجع الشغل متنكر في شكل بكار
انس بضحك: بكار بكار المهم اني اصيف
زين: رحمه اي حاجه تعاوزيها قوليلي
وانس معاكي برضو لو فيه حاجه وقفت معاكي
رحمه: اه اه طبعاً
تقريبا المسلسلات التركي قصرت علي عقلي وتوقعت انه هيبقا متعصب ومش طايقني
وهيزود عليا ضغط الشغل والحاجات دي
بس برضو الحمدلله ان السناريو ده محصلش وطلع محترم وعاقل
____________________________________
عدا كذا يوم وهو طبيعي جدا ومكلمنيش في الموضوع تاني لدرجه انه شغل بالي
وفكرت انه ممكن يكون كان يدوبك معجب بيا وقال يجرب حظه ولما رفضت شالني من عقله
وده تفكير منطقيّ بس مش عارفه ليه ضايقني
ندا: عامله يا مشاكل
رحمه: يابنتي انا اخت خطيبك يعنى عمتك في المستقبل احترميني شويه بقا
ندا بضحك: من عنيا
بس قوليلي زين عامل ايه معاكي
رحمه: هو انا مقولتلكيش انه قالي عاوز يتقدملي
ندا بفرحه: ومخبيه الاخبار الحلوه دي لييييه
قوليلي حصل ايه
رحمه بقلق من رد فعلها: هحكيلك اللي حصل
وقولتلها الكلام اللي حصل بينا واني رفضته…..
وهي كانت بتسمع بهدوء قلقني زياده
رحمه: بس كده ومن ساعتها وهو مكلمنيش في الموضوع ده تاني وبيعاملني ك زمايل
ندا: ليه يا عدوه الفرحه بائسه
رحمه: اهدي بس
ندا: ليه كده ياللي هتشليني وانا لسه صغيره
رحمه بهزار: طب اهدي علشان صحتك
ده انتي ماشيه بمقويات
ندا: حرام عليكي يا ام بدوي حد يعمل اللي انتي عملتيه ده
رحمه: خلاص بقا اللي حصل حصل
وليه كان خيراً لبقا
ندا: يعني انتي عاوزه ترمي واحد من الدور السابع وتقولي لو كان خيراً ل عاش مثلا!!!؛
رحمه: لا انا مش هقعد اجلد في نفسي
انا هقوم انام احسن…. يلا روحي شوفي خطيبك فين
ممكن يكون رد فعلي كان سريع وكان ممكن اقوله سيبني افكر
بس الشعور اللي كان مسيطر عليا وقتها اني مش عاوزه اتعلق بحد ولا اربط فرحتي بوجود حد
هربت من كل الافكار وجلد الذات ونمت كأني خايفه اواجه عقلي……
محمود: رحمه رحمااااااااه انتي نايمه بدري ليه
رحمه بنوم: مرهقه شويه
محمود: طب قومي جبتلك لب وشيبسي وهنسهر مع ماما شويه
رحمه: جبت ايس كريم؟
محمود بضحك: بشكولاته كمان
رحمه: ده فايقه وصاحيه اصلا اهو
طلعت وقعدنا نتفرج علي فيلم ونهزر وحسيت ان طالما هما معايا انا مش هحتاج اي حاجه تاني
ومش مهم يكون في حد في حياتي
محمود: اه صح انا كلمت ابو ندا واتفقنا اننا هنقدم كتب الكتاب
رحمه: بجد؟؟
محمود: اه اصل الشقه جهزت وفاضلها تفاصيل بسيطه
هاله: ربنا يتمملك علي خير يا حبيبي
انا اه فرحانه علشانه بس قلبي دق بخوف من بعده بس طردت الافكار دي من دماغي وكمان ندا كويسه واكيد هنفرح كلنا
محمود: زين كلمني انهارده
قلبي ده بفرحه وقلق وركزت مع كلامه
محمود: قولتله اني خلصت الشقه ف باركلي وقالي انه هيحتاجني علشان يجهز الشقه بتاعته وكمان هو هيخطب
وقبل ما اخد اي رد فعل ماما اتكلمت
هاله بتوتر: ياولاد فيه حاجه عاوزه اقولكم عليها
محمود: خير يا ماما
هاله: عمكم عرض عليا الجواز تاني وقالي انكم كبرتم وخلاص محمود علي وش جواز
ورحمة ممكن في اي وقت تتجوز وانا هفضل في البيت ده لوحدي
وانا مش عارفه اقوله ايه
رحمه:………….
يتبع..
هاله: عمكم عرض عليا الجواز تاني وقالي انكم كبرتم وخلاص محمود علي وش جواز
ورحمة ممكن في اي وقت تتجوز وانا هفضل في البيت ده لوحدي
وانا مش عارفه اقوله ايه
رحمه بصدمه:………..
محمود: وانتي رائيك ايه يا ماما
هاله: انا مش عاوزه ابقي لوحدي
مش عاوزه يجي عليا الوقت واكون بشحت وجودكم علشان طول اليوم قاعده لوحدي بكلم نفسي منغير ونيس
محمود: وانا معنديش مانع
أنتي ربتينا واستحملتي حاجات كتيره لوحدك
رحمه بحزن وصدمه: وانا!!!!
كل واحد فيكم فكر في نفسه ونستوني
انت كلها كام شهر وتكون اتجوزت
وكمان ماما عاوزه تتجوز وتعيش باقي حياتها مع ونس
طب وانا!!! انا بستحمل اي حاجه ومش بدخل حد حياتي علشان انتو مالين حياتي
فجاءه كده عاوزين تنسحبو منها؟؟؟
إيه الانانية دي
هاله: انتي اللي موقفه حياتك
انتي اللي خايفه من كل حاجه بعد موت ابوكي وبقيتي تخافي تجربي او حتي تعملي صحاب في حياتك علشان خايفه يسبوكي
انتي بقيتي خايفه تتعلقي بحد ولازم تفوقي بقا
محدش اناني
انتي دايما خايفه ومعذبه نفسك
رحمه بدموع: يعني في الاخر انا اللي غلطانه
وانتم الملايكه اللي مش بتغلطو وبتعرفو تعيشو حياتكم صح؟؟؟
هاله بزعيق: لو مش واخده بالك انك بتكلمي امك وان اسلوبك غلط يبقا قومي من قدامي
رحمه: حاضر انا هدخل اوضتي
هاله: اه ادخلي واهربي حتي من نفسك بالنوم
دخلت الاوضه وانا حاسه ان كل النور اللي كان في حياتي ضلم…. أمي و بعد اخويا و خطوبه زين اللي كنت بفكر ارجع في قراري معاه
كلام امي بيرن في دماغي ان انا اللي موقفه حياتي وبخاف اجرب اي حاجه وانا اللي مريضه وجبانه
عياط وذكريات وصداع وكلام كتير في دماغي ف لقيت عيني بتقفل ونمت او هربت!….
_____________________________________
محمود بصوت واطي: انا حاسس ان احنا ضربنها كذا خبطه ورا بعض
هاله بحزن: علشان تفوق يا ابني
دي قافله حياتها وقافله علقها وعنيها ومش عارفه حتي تشوف الشخص اللي قدامها ده كويس ويستاهل فرصه ولا لأ
محمود: بس ليه صممتي إنك تقولي ان عمي ابراهيم اتقدملك
هاله: علشان علقها يفوق من منطقه الراحه
هي حاسه اننا هنفضل معاها وبندعمها وهي مطمنه في حضننا
بس ده مش بيفضل دايم
انت هتتجوز وهتتشغل في حياتك وشغلك وتزود دخلك وقدام شويه هتتشغل اكتر باولادك
وانا يابني صحتي في النازل
وقلبي مبقاش مستحمل يفضل خايف عليها
انا موجود دلوقتي بس ممكن مكنش موجوده بكرا وهي مش عاوزه تفهم ده
محمود بحنيه: ربنا يديكي الصحه وطول العمر يا أمي
هاله: ربنا يطمن قلبي عليكم يا حبيبي
___________________________________
صحيت قبل الفجر والصداع بيزيد وحاسه بخنقه شديده
قومت ادور علي برشام صداع في درج المكتب لقيت المصحف عليه شويه تراب
مسكته بحزن علي حالي وعلي المصحف اللي جيه عليه تراب علشان اتلهيت في الدنيا وسبته شويه
انا تركت خير صديق وبعد عن ونس ربنا هلاقي الفرح والسعاده فين؟؟
استعذت من الشيطان ودخلت اتوضا ورجعت بسرعه كأني عطشانه اللأمان والراحه
قراءت شويه وصليت ركعتين قبل الفجر وفتحت الفون لقيت صديقه عندي منزله البوست ده
ضُّم قَلبك واقرأ عليهِ ” أَلَيْسَ اللَّهُ بِكَافٍ عَبْدَهُ”
واذا ارتَّعد خوفًا دثِّرهُ بـ
” وَلَسَوْفَ يُعْطِيكَ رَبُّكَ فَتَرْضَىٰ”
واعلم أنَّه ماستأنسَ بِالله أحدٌ إلا و آواه ، وما رفع أحدٌ يدهُ إليهِ إلا وأعطاه ، فلا تُكثِرنّ مِن التباكي والأسفْ واترك لله شتات أمرك، فكُل الكون تحْت أَمرهُ، إذا أراد منهُ شيء قال لَهُ كُن فَيَكُونُ ، وكُل أحلام قلبكَ في خزائن اللّٰه وَمَا ذلِكَ عَلَى اللَّهِ بِعَزِيزٍ”
فرحت وارتحت يمكن لو قرأت الكلام ده في وقت غير ده مكنش هيأثر فيا كده
اخدتها اشاره وشلت اي خوف من قلبي وقررت اتاسف ل ماما وافرح ل فرح أخويا واعيش حياتي وانا مع أمان ربنا وهترك شتات امري وتفكيري الزياده في كل حاجه…….
دخل اذان الفجر بفرحه علي قلبي وان مع كل ضلمه نور وشروق شمس يوم جديد……..
تاني يوم صحيت كأني واحده جديده ولا كأني حاجه حصلت امبارح وقررت اول حاجه اعملها اعتذر ل ماما وبعد كده اشوف موضوع عمي ده
رحمه: ماااامااااا
الساعه 1 وانتي لسه نايمه لا لا اومال فين فوايد الصحيان بدري
كانت مدياني ضهرها وهي بتعمل كده لما بتكون زعلانه مني
رحمه: طب لو مكلمتنيش هروح اعمل كيكه هااا
يعني هتخسري البيض والدقيق والسكر اي رأيك
لما مردتش استغربت لانها كل مره ترد وتقولي كيكه لاااا مش عاوزه اخسر البتوجاز بتاعي
رحمه بقلق: ماما انتي كويسه!!!
مردتش عليا ومسكت ايدها وسبتها ف وقعت ولون وشها متغير
رحمه بخوف وعياط: ماما مامااااا
لا لا انتي اكيد هتبقي كويسه
انا بكلمها وبحاول اوفوقها بالبرفان لكن مفيش فايده ومحمود مش بيرد عليا
رحمه بعياط: يارب يارب مش عارفه اتصرف يارب
حسيت ان قلبي هيقف من خوفي عليها دي هي نور حياتي…. واكيد هي نامت زعلانه مني
وبدءت الافكار السودا تدخل عقلي وانا مش عارفه اتصرف وحتي مش عارفه ادعي وبقول يارب بدموع
وفجاءه افتكرت غيبوبه السكر اللي جتلها قبل كده وانا في اولي جامعه لما رجعت ولقيتها نايمه علي السرير مش بتتحرك برضو
يتبع..
لقيت تلفوني رن بأسم محمود: كنت بركن العربيه ومش سامع التليفون في حاجه؟؟
رحمه بتوتر وخوف: ماما… ماما جالها غيبوبه السكر تعال بسرعه بالله عليك بسرعه
محمود بخوف: 5 دقايق وهكون عندك متقلقيش
دخلت لبست في ثواني وحاولت البسها اي عبايا وطرحه لحد ما يجي
جيه وطلع معاه واحد من سكان العماره وانا معاهم ونزلنا ماما العربيه ولحسن حظنا المستشفى قريبه مننا
الدكتور قال غيبوبه سكر فعلا وقعدنا شويه وانا برضو قلقانه عليها وندا جت وحاولت تهديني شويه
والحمد الله فاقت وبقت احسن
وانا كل اللي جاي في بالي ان ربنا مديني نعم وانا اللي مش واخده بالي منها ومش بحمده عليه
ومنها نعمه وجود امي ونعمه ان اليوم بيمر بسلام منغير تعب ولا فزع ولا خوف
الأمان ده نعمه كبيره واحنا اتعودنا عليها
رحمه: الف سلامه عليكي يا ماما
والله قلبي كان هيقف من الخوف عليكي
هاله بتعب: بعد الشر عليكي يا حبيبتي
رحمه: متزعليش مني يا أمي حقك عليا والله مكنش قصدي
انا بس كنت مصدومه ان عمي اتقدملك
محمود: ياستي والله محدش اتقدم ولا حد اتأخر ده احنا كنا بنشوف رد فعلك بس
كمل بهزار: ويارتنا ما شوفنا، دراما كوين وضربت في وشنا
رحمه بفرحه وصدمه: بجد والله!!!
بصيت ل ماما: بجد يا ماما؟ يعني مش هتتجوزي عمي!!!
هاله: لو عاوزه اتجوزه كنت وافقت عليه زمان
انا محدش هيملي عيني وقلبي بعد ابوكي الله يرحمه
حضنتها اوووي ودمعت من كلامها واضايقت من الكلام اللي قولتها امبارح
فضلت ابوس راسها وايدها
محمود بهزار: ايه ايه انتي هتاخدي الحب كله لوحدك ولا ايه!!!
رحمه بضحك: ايوه هاخده كله لوحدك
روح انت بقا ل ندا يا حبيبي
ندا دخلت ومعاها عصاير وباتيه
ندا بهزار: يعني انا نزلت اجبلك عصير وانتي بتتكلمي عليا !!!
رحمه بهزار: ده انا بقوله لازم تسرع جوازك من ندا
محمود: علي فكره انا هقدم كتب الكتاب فعلاً انا مكنتش بهزر
رحمه: والله ياريت علشان تطبل كل شويه تقولي حضريلي الأكل
وكمان هجيب صحابي البيت وممكن يباتو معايا
محمود: ده انتي هتستغلي الشقه لوكاندا بقا
رحمه: ايووون وماما حبيبتي موافقه
فضلنا نهزر ونتكلم وعيني علي ضحكه امي اللي كنت هتحرم منها من شويه
روحنا البيت وبليل جت طنط هدي جت مع زين علشان تتطمن علي ماما
هدي: الف سلامه عليكي يا حبيبتي والله لما عرفت معرفتش امسك اعصابي واضايقت انهم مقالوش غير لما وصلتي البيت
هاله بإبتسامة: هما بس كانو مخضوضين عليا
وبعدين انا كويسه قدامك اهو
قعدو يتكلمو مع بعض وزين قاعد علي كرسي قريب مني
زين: خوفتي عليها صح؟
رحمه: فوق ما تتوقع
زين: بس لو كنتي فضلتي واقفه وخايفه ومعملتيش تصرف صح زي انك تتصلي ب اخوكي كان ممكن يحصل مشكله صح؟؟
رحمه بإستغراب: قصدك ايه؟
زين: قصدي ان الخوف مش بيحل حاجه
بالعكس ده ساعات بيزود المشاكل وبيمنع عقلنا يشوف الحل الصح
فهمت قصده ف بصتله ومردتش
زين بإبتسامة: لو سندريلا فضلت خايفه من مرات ابوها الشريره مكنتش هتروح الحفله اللي قابلت فيها الامير علي فكره
رحمه بإبتسامه ومشاغبه: بس لولا الساحرة مكنتش هتقدر تروح الخفله
زين: الساحره عرفت ان سيندريلا عندها استعداد تروح وتجرب
سيندريلا كانت شايفه انها تستاهل تروح الحفله زي باقي البنات وتلبس احلي فستان كمان
رحمه بفرحه: فعلاً سيندريلا تستاهل تروح الحفله وتقابل الأمير
زين بإبتسامة: ده يابخت الامير والله
كنت عاوزه اعرف هو لسه ماسك فيا ولا لازم
رحمه: بس ياتري الأمير هيستناها رغم انها اتأخرت شويه؟؟
زين: لازم يستناها علشان قصته مش هتكمل ولا هتكون حلوه إلا في وجودها
قلبي دق بفرحه غريبه وافتكرت محمود لما قالي انه هيخطب ولقيته واقف في البلكونه ف اتحججت اني هروح اجيب حاجه يشروبها واجي ودخلته البلكونه
رحمه بهمس: محمود
محمود بخضه: بسم الله الرحمن الرحيم
ياشيخه حرام عليكي هقطع الخلف بسببك
رحمه: هو سؤال واحد وترد عليا بصراحه وبسرعه علشان الناس برا
محمود: انجزي يا رحمه
رحمه: زين قالك انه هيخطب بجد؟؟
محمود بتوتر وبيبص يمين وشمال: بتسألي ليه
رحمه: انت بترد السؤال بسؤال ليه
محمود: بصي بصراحه كده
رحمه: قول ياقلب اختك قول
محمود: زين قالي إنك رفضتي انه يتقدم ف قالي اني مقولكليش حاجه ومضغطش عليكي
بس انا بقا فكرت اني لو قولتلك انه هيخطب ف تراجعي تفكيرك تاني وتعرفي إنك اتسرعتي
رحمه:…………
محمود: انتي بتبصيلي بشر كده ليه
رحمه: متزعلش بقا لما انا كمان اشغل دماغي وافكرلك في حاجات كريتڤ ماشي؟؟؟
محمود: ده انا اخوكي حبيبك وفرحي قرب
رحمه: وهو ده المطلوب
تخيل كده قاعد مع عروستك وفرحان فجاءه يتعرض صور العريس في اسكندريه وهو بيصيف
او صور اعدادي الغريبه بتاعتك
او مثلا اعملك مفاجأة الاخوات دي واغنيلك واقول بلاوي عليك وفي الاخر اقولك متزعلش يا عريس انا بس بعرف العروسه وههههها وكده
محمود: انتي لحقتي فكرتي في كل ده وانتي واقفه كده!!!!
رحمه: تخيل بقا لو قعدت مع نفسي وفكرت وخطتت
محمود: اه ياحوستي السودا يانا ياما
كتمت ضحكتي: لا تخافوا ولكن احذور
محمود: خدي هنا يا ست هند صبري انا كنت عاوز انصحك وافتح عينك علي الحياه
رحمه: بص انا هعديهالك علشان انت اخويا وعريس وكده
محمود: جدعه واصيله والله
رحمه: بس تنزل تجبلي مانجا وشيبسي وايس كريم
محمود: ماديه واستغلاليه والله
رحمه بضحك: ثانك يو حودا
______________________________________
الايام اللي بعد كده عدت بخفه وسعاده وانا مش خايفه وحاسه بأمان وحاسه بقيمه النعم اللي في حياتي
وبروح الشغل الصبح وبليل بجيب مع ندا الرفايع وبنلف لحد رجلي ما تورم وارجع اقعد مع ماما شويه وانااااام
وجود زين في حياتي كأن مميز دايما بيطمن عليا وبلاقي نفسي بحكيله عن تفاصيل اليوم الصغيره وحتي الحاجات الغربيه اللي بشتريها مع ندا
زين: انتو هتشترو ايه دلوقتي
رحمه: رافيع المطبخ…
وقطاعه البصل وقطاعه التفاح وقطاعه الخضار
وقطاعه البيض وقطاعه ال……
زين: باااس باااس هي السكينه قصرت معاكم في حاجه!!!
رحمه: علي فكره دول مهمين
زين: يعني البيض هيزعل لو اتقطع بالسكينه؟؟
واصلا احنا مش بنقطع التفاح
رحمه: ده لسه فيه حاجات كتيره كمان
زين: هو محمود معاكم!!!
رحمه: لأ
زين: عارفه هو لو معاكم هيعمل إيه؟
رحمه: ايه؟
زين بضحك: انتو هتشترو وهو هيرجع الحاجه من وراكم
رحمه: والله انا بنحب الحاجات دي وبتلفت نظرنا
زين: طب عارفه لو انا معاكي بنشتري الحاجات دي هعمل ايه؟؟
رحمه بفضول: هتعمل إيه؟؟
زين: هفضل ادور معاكي علي الحاجات دي علشان بس اشوفك مبسوطه
جمله بسيطه بس فرحتني اوي… هو كلامه بيفرحني اكتر من اي كلام رومانسي كنت بسمع عنه قبل كده
كان احلي واصعب يوم لما نزلت اشتريت الفستان سيمبل اوي كان لونه موڨ ستان وطويل شويه من ورا وعجبني اووي
من الصبح كنا في الكوافير وفرحتها كانت مزوده جمال فوق جمالها
ولحظه ما شوفت محمود داخل علشان يوخدها كنت شايفه بعيني قمر وشايفه بقلبي قمرين كانو لايقين علي بعض فعلاً
وصلنا القاعه ودخلو بزفه حلوه وكلنا كنا فرحنين
شوفت زين… قلبي دق اول ما شوفته ببدلته السودا كان شكله عريس واجمل عريس كمان
قرب مني بإبتسامة بتاخد قلبي: خلايتي الفستان جميل
زي الاميرات بتحلي وبتعملي قيمه ل اي حاجه تلبيسها او تلمسيها
البنت العنيده اللي بتتكلم كتير و بتتخانق واقفه قدامه مبتسمه ولساني معقود ومش عارفه اتكلم
زين: طب استغل الوقت ده واطلب ايد احلي سندريلا وتدخل حياتي وتحليها واخد نصيبي من اسمك وتبقي رحمتي!!
رحمه بصدمه وفرحه: إيه ده!!!
زين: انا طلبت ايدك من محمود امبارح وقالي لما توافقي
رحمه: طب ولما اوافق!!
زين: “لما توافقي هيبيع جواهري في يوم خاتم
هيجيب مؤذون عشا لعياله
هيزيد مشروب وهيبقا اتنين ونضيف للدنيا اتنين عشاق
وإذا موفقتيش فيه رزق هيبقا انتهي مقطوع وانتي مترضتيش تقطعي ارزاق” عمرو حسن
رحمه بضحك: موافقه يا زين
زين بضحك: ده يافرحه قلب زين والله
“ليس بمرور الوقت وعدد السنين، فهناك من تشعر بالانتماء له فور لقاءك به❤
فكيف لي لا احب قلباً رأيت به موطني”❤❤
انتهي
