روايات رومانسية
روايه قانون ايتن الحلقه 7
ايتن بتوجس:
-صحيح يا منة مبتفكريش تشتغلي؟
منة بلامبالاة:
-لا انا ماليش في الشغل خالص،انا مش بتاعة شغل لا
ايتن بمحاولة إقناعها:
-ما هو حمزة قالى كده برضو، المهم يا منوش احنا عندنا في الاوتيل فيه سبونسر مقدمين كورسات انجلش وفرينش للخريجين إللى لسة احتياطي عندنا عشان طبعا اللغة مطلوبة في مجالنا فـ منها يدرسوا اللغات المطلوبة دي و في نفس الوقت بنعمل ديسكونت ليهم وطبعا ده عائد لينا لأن ده بيعمل دعايا للاوتيل و دى كانت فكرة بتاعتي قررت انفذها واتفقت مع الاسبونسر اللي مقدمين يشتغلوا معانا ولما حكيت لحمزة وافق وحتي دفعلك اول شهر للكورس
حمزة بحدة:
-يعني عشان تبطلي التفاهات بتاعتك دي وتتعلمي حاجة مفيدة و اهم حاجة يا منة متكراشيش على المستر إللى هيشرحلك ولا حد من زمايلك فى الكورس
تمتمت منة بضيق:
-مكنتش هعمل كده علي فكرة ..و اصلاً يعني كان المفروض تاخد رأيي
حمزة بدهشة :
-ليه انتِ مش موافقة ؟
قهقهت بمزاح:
-أيوة الفلوس اللي دفعتها في الكورس دي مش كان فستان فرحي أولي بيها
زفر بضيق ليجيبها بنفاذ صبر:
-الفستان علي العريس يا منة إللى هو لسة مجاش اصلاً
__________________________________
في صباح اليوم التالي
في الفندق وبالتحديد مكتب ايتن ،فهذا اول يوم لمنة لبداية الكورس، كانت تتجول بنظرات عينيها إلى جميع من في الشركة
لتسأل ايتن :
-تونا مش ملاحظة حاجة!
ايتن بابتسامة:
-ايه يا منوش؟
منة بإعجاب:
-كل إللى في الفندق رجالة يفتحوا النفس كده، واضح ان الكورس ده بداية فتحة خير ليا
حمزة بنبرة حادة:
-انتى جاية تتجوزي ولا تتعلمي ؟
تنفست بعمق لتجيبه بتبرير:
-فيها ايه لما أتجوز يعني، اهو اترحم منك و أربي العيال
حمزة بإنزعاج:
-تصدقي أنا غلطان ان اشتركتلك في الكورس
منة بحسرة وندم:
-مش كنت وفرتهم في حاجة في جهازي احسن قُلتلك هتندم مسمعتش الكلام
صمتت قليلا لتسأل ايتن قائلة :
-ايتن هو انتي عندك حد متوفي؟
ايتن بإستغراب:
-لا اشمعنا !!
قطبت حاجبيها بحيرة:
-اصل انتِ يعني علي طول لابسة اسود
حمزة بسخرية:
-انتِ مشوفتيهاش غير تلات مرات لحقتي تكتشفي بتلبس اسود علي طول
ايتن بهيام:
– لا يا منة انا بحب اللون الأسود
منة بدهشة:
-معقولة ! ده لبسك كله كده والشنط والشوزات و موبايلك والجراب حتي الهاند فري بتاعك اسود ..مع ان بصراحة ذوقك تحفة في اللبس بس برضو مش لدرجة ان كل لبسك اسود
حمزة بإستغراب:
-بتحبي اللون الأسود للدرجة دي !
أجابته مبتسمة:
-لأن الأسود ببساطة لون بيحبني، متستغربش الأسود فعلا بيحبني وانا مش في إيدي حاجة غير أن انا أحبه ..الأسود سيد الألوان فعلا زي ما بيقولوا
فالأسود في غرفتها, ستائرها لونها اسود
،كمبيوترها أسود، طاولتها، هاتفها, احذيتها، حقائبها، وحتى فنجان قهوتها..فهي تفرح لرؤياه, وتحب دوما ملامسته حولها..حتي على كل شيء..تشعر أنه نقيا في كل مكان
ضحكت منة:
-أنتِ مجنون بالأسود …لا صدقيني أنتِ مجنونة بيه انا هطلع اشوف حسناء
خرجت منة من المكتب، بينما صمتت ايتن لدقائق فقاطعها حمزة ممازحا:
-خلاص انا الأسود سيفتك بيه
تعجب حمزة كثيرا حينما عرف أن لونها المفضل هو الأسود ..حاولت تبرير عشقها له ..وان هناك ألوان أحياناً تحبها كلما تراها كالأزرق والبنفسج، لكن الأسود عندما ترآه يأسرها
الأسود لون تحب أن ترى به.. تشعر بأنه الوحيد الذي يرضي غرور عيونها حينما لا يعجبها حيرة الأشياء المختلطة على تدرجات لونية بين آلاف الألوان..
لا تتعب نفسها كثيرا بالبحث؛ فالأسود يحتويها، تحتضنه عند كل حزن، تغلف به ذكرياتها
ليتابع حمزة حديثه بمحاولة إقناعها:
– بس الاسود مش لون يا ايتن ..انا عارف انك بتحبيه بس هو مش لون.. الأسود ده غياب كل الألوان .. فيه ناس بتفضله لكن عندها ألوان تانية مفضلة مش لدرجة حبك ليه كل ده !
ايتن بدهشة فلأول مرة يعاند معها أحد ويطول الحوار بخصوص عشقها لهذا اللون فأجابته بنفي:
-ازاي مش لون! هو بيخطفني عن كل الألوان التانية بيخليني مشوفش غيره ..جربت احب ألوان تانية معرفتش ..لقيت الاسود ملكني فعلا
سألها بتوجس:
-عشان كده شعرك كمان لونه اسود ؟
اومأت بإيجاب:
-شعري اصلاً كان لونه بني فاتح شوية بس انا غيرته وخليته اسود
قهقه حمزة قائلاً بابتسامة:
– برضو! مجنونة بيه علي رأي منة
__________________________________
وقفت مع حسناء “سكرتيرة ايتن” التى تعرفت منة عليها بعدما عرفت أنها ستشاركها كورس الفرنساوى فى وقت الفراغ واستأذنت من ايتن ان تأخذ الكورس
منة بإعجاب:
-ده فيه شوية مزز هنا في الاوتيل عندكم
ضحكت حسناء:
-شكلنا مش هنكمل يومين في الكورس يا منة
ثم تابعت بجدية :
-يلا طيب عشان منتأخرش
__________________________________
بعد انتهاء الكورس، ذهب ليطمئن عليها ويعرف ما فعلته فى اول يوم لها
سألها حمزة بشك:
-ايه معجبكيش حد من الكورس؟
اجابته منة بثقة:
-لا
قطب حاجباه بدهشة :
-ازاي! طب انتي سخنة؟
قهقهت منة ومطت شفتيها قائلة ببراءة:
-شوف بتجرني للرزيلة وانا الصراحة بحبها
وجه حديثه لحسناء:
-بجد يا حسناء ..منة معجبهاش حد في الكورس ؟
حسناء بصدق :
– لا بصراحة وانا استغربت حتي
منة بضحكة:
-شُفت بقى!
حمزة بتصحيح:
– لا سمعت ياختي
_________________________________
بعد مرور عدة أيام
في شركة السياحة
كان هناك اجتماع مع أعضاء الفندق، طلبت ايتن قبل بدأ الاجتماع من السكرتيرة، قائلة:
-اطلبيلي قهوة بليز معاكي
ابتسمت حلا “سكرتيرة هاني” بمكر ودلفت إلى الكافيه الخاص بالشركة، قائلة للعامل بأمر:
– اعملي شاي
أومأ الرجل بإيجاب :
-طب هودي القهوة للانسة ايتن علي ما ارجع لحضرتك عشان هتبرد
زفرت حلا بعصبية :
-انت مسمعتش قولت ايه؟؟ بقولك اعملي وعادي أعملها تاني..هحاسب عليها انا
الرجل باستسلام:
-تحت امرك حاضر
لتقول فجأة قبل ان يصب القهوة:
– غالبا في حد عايزك شوف كده مين وانا هاخد بالي من القهوة
ثم خرج الرجل، بينما هي وضعت في القهوة منوم
__________________________________
لاحظ حمزة أثناء الاجتماع ان ايتن تضع رأسها كثيرا علي المنضدة، وعلي ملامحها النعاس؛ فتأكد أنها تريد النوم
ضرب قبضته علي المكتب أمامها بقوه فانتفضت ايتن؛ ليقول بصوت عال :
-صباح الخير يا ايتن
نظرت إليه بعيونها العسلية الواسعة، وهي تحاول ان تفيق، قائلة بتلعثم:
– ص..صباح الخير يا مستر حمزة
حمزة بنبرة ساخطة:
-لما تصحصحي كده ابقى تعالى مكتبي عايزك
ابتسمت حلا بمكر، قائلة :
-باين عليكي منمتيش كويس؟ المفروض اجتماع مهم زي ده حضرتك كنتي تنامي بدري
رمقها حمزة بغيظ، قائلا بحدة:
-لما انا اتكلم انتي ميخصكيش تتكلمي اصلا
حلا بإحراج:
-سوري يا فندم انا بس كنت..
قاطعها بتجاهل:
-خلاص
__________________________________
كانت منة تتحدث عبر الهاتف مع إحدى صديقاتها لتسألها عن ابن عمها
منة بفضول:
– إيمى هو ابن عمك إللى شوفته عندك اخر مرة مرتبط؟
-اه .. بس هو اصغر منك اصلاً بسنتين
منة بملل:
– احيه يعني مرتبط وعيل كمان
-وبعدين هو مش حلو يا منوش
منة بنفى:
– حرام عليكي ده عسل اوي
– لا عشان انت متعرفيهوش ..وغير كده صايع ومش نافع في دراسته
منة بذهول:
– بجد ؟
– أيوة بجد .. انا مش عارفة حبيبته الغبية دي حبته علي ايه
منة بابتسامة:
– ربنا يسعدهم ويهديه
_________________________________
طرقت باب مكتبه عدة مرات، ليسمح لها بالدخول
قائلة برسمية:
-أيوة حضرتك طلبتني ليه
حمزة وهو يتفحص بعض الأوراق ويتابع من خلال الحاسوب الخاص به دون ان يلتفت إلى ايتن
قائلا بنبرة ساخرة :
-صحصحتي؟؟؟
هتفت ايتن بارتباك وهي تجلس على المقعد أمامه:
-ها
نهض من مقعده، وتوجه أمام مقعدها ثم ضرب المكتب بيده بقوة، وهو يميل عليها قائلا بنبرة حادة:
– صحصحتي بقول؟
كانت أنفاسه قريبة بشدة تلفح رقبتها كانت أنفاس غاضبة، طالعها لحظات وكأنه يستكشف أنها حقا استيقظت..ثم انهي فحصه ليجلس على المقعد المقابل لها
اجابته بثبات :
-ااه الحمد الله
حمزة بجدية :
-انا طلبتك علشان اوضحكلك حاجات مهمة..
أومأت رأسها بإيجاب، ليستكمل قائلا بسخرية:
– انا هنا مدير العلاقات العامة مستر حمزة يعني المواعيد مظبوطة وبنشاط … مش علشان ضمنتي الشغل معانا يبقى خلاص تتدلعي
ردت باندفاع :
-انا عارفة كل ده مقولتش معلومات جديدة يعني، واللى حصل من شوية ده اول مرة يحصل ومعرفش ازاي نمت، واكيد مش هيتكرر حضرتك
حمزة بحذر :
-إللى هيخلينا نستمر فى مع بعض في الشغل هو نشاطك وشغلك واجتهادك غير كده هنفصل العقد… واجتهادك هيبين اذا كنتوا تستحقوا نكمل ولا لا .. لأن مينفعش مسؤولة الماركيتنج تبقي فاشلة و كسولة
همت بالهجوم مجددا، قائلة بغضب لذلك المغرور:
-لا معلش حضرتك..انا مش فاشلة و ده بشهادة كل اللي اتعاملوا معايا حتي اسأل…
قاطعها قائلا ببرود:
-انا ماليش دعوة بحد ولا اسأل حد انا ليا الفعل..اشوف شغل كويس أتأكد انك فعلا شاطرة غير كدا ميخصنيش السي في بتاعك ولو اني مش واثق اوي يعني انك عملتي كل ده
رمشت عدة مرات قبل تهتف بثقة، عكس ما بداخلها من براكين وغضب:
-ان شاء الله مش هخيب امل حد وهثبت ده بسرعة و اوي كمان
التفت إلى الأوراق التى أمامه، قائلا ببرود:
-اتمنى كده ..اتفضلي انتي دلوقتي لأن معايا شغل ولو حابة تسالي عن حاجة خاصة بالشركة في برة السكرتيرة بتاعتي ممكن تعرفك اى حاجة
طالعته بصدمة لتردف بذهول:
-انت ايه الثقة اللي بتتكلم بيها دي كلها..حضرتك الاوتيل بتاعنا برضو مش قليل
حمزة بغرور:
-بس علاقاتنا أوسع ومتنسيش ان جت عليكم فترة الشغل وقع اوي
ايتن وقد فاض بها الكيل:
-عادي جدا.. ما يقع الا الشاطر ولا ايه؟؟
ضحك حمزة قائلا :
– لا عجبتيني
هتفت بغرور:
– طبيعي وهو انا أي حد برضو
ابتسم ثم عاد لمتابعة عمله، وتجاهلها.. بينما هي زفرت بضيق ثم خرجت من مكتبه
_________________________________
في الفندق
بعد انتهاء الكورس جالسة فى مكتب ايتن تستمع إلى مهرجان شعبي فهذا النوع من الاغاني المفضلة لمنة، وهي تردد مع المقطع :
“غدر وجرح وقلة فرح ودنيا شمال ذل وقهر ولعب الزهر مع الأندال.. سكة مخيفة ودنيا عنيفة و قالبة الحال نفسي ألاقي أنا واحد باقي يكون سندال”
قاطعتها ايتن بتساؤل:
-ايه ده مالك؟
تنهدت منة بحزن :
-الكراش بتاعي طلع مرتبط واصغر مني
ضحكت ايتن لتسألها بفضول:
– أنهى واحد فيهم ؟
أزالت منة نظارتها الطبية عن وجهها لتجيبها بعتاب:
– محسساني ان انا بكراش علي 500 واحد
ايتن بتصحيح:
– لا طبعا 300 بس
منة بعتاب مزيف:
-شوف غدر الصحاب !
ايتن بدهشة:
-هو انتِ كل كراش ليكي لازم يكون فيه حاجز يمنعكو!
منة بحزن:
-حظي بقى
ايتن بثقة:
– يا روحي انتِ قمر اصلاً يعني هما اللي يكراشوا عليكي مش انتِ
منة بتعديل:
– قمر بس نحس
اجابتها بابتسامة :
-لا مش نحس ولا حاجة، ربنا لسة مبعتلكيش نصيبك الحلو
__________________________________
في منزل خديجة
زفرت ايتن بضيق وهي تتحدث عن حمزة:
-سبحان من صبرني عليه بجد..انا كل شوية افكر اغير رأيي واقول لشذي مش هكمل المهمة دي بس برجع في قراري
ضحكت خديجة :
-تصدقي عندي فضول اشوف حمزة ده
زغرت لها ايتن بغضب:
– انتى بتضحكى علي ايه يا خديجة ..انتى لو عرفتيه هتكرهى نفسك
خديجة بتفكير:
-ليه يعنى..بس عاجبني اوي حوار القط والفار اللي انتوا فيه
رمقتها بغيظ:
– ده بني ادم سخيف وقليل الادب وقليل الذوق وكل الصفات الرخمة فيه
– معلش يا تونا انتي خلصي مهمتك و وقعيه و بعدين ابقي اديله بالجزمة
صاحت ايتن بزهق:
– ما هو ده اللي هيحصل بس المشكلة أنه تقيل اوي
_________________________________
بعد عدة أيام
كانت تجلس مع رجل أعمال في مطعم لتتابع معه صفقة خاصة بالفندق
قائلة برسمية:
-حضرتك عندك اي ملاحظات على اللي قولته يا فندم؟
اجابها بخبث:
-هو إللى يشوفك يعرف يعترض علي حاجة تانية؟؟
زفرت بضيق متجاهلة تلميحاته، قائلة بحدة:
-شروطك يا فندم ؟؟
غمز لها قائلا باعجاب:
-خلاص متزعليش.. انا اصلا بحب النوع التقيل اوى دا اللي زيك..عموما انا مبسوط جدا بالشغل معاكم ومتنسيش ان انا هحط مبلغ عندكم مش قليل برضو
__________________________________
بينما علي الجهة الأخرى
في نفس المطعم علي طاولة بالقرب من ايتن..كان حمزة يجلس مع رجلان يتناقشون عن صفقة جديدة
كان حمزة يتابع الموقف بالصدفة، أو من الفضول، لكنه لم يري وجه ايتن لأنه تجلس بظهرها، فرأي تعابير وجه الرجل وغمزاته.. ضحك ثم عاد ليستكمل حديثه مع العملاء
__________________________________
علي طاولة ايتن
صاح الرجل بزهق وهو يعطيها شيك:
-بقولك ايه..تحبي تاخدي كام وده برة شغلك طبعا.. ولا تحطي المبلغ بنفسك انتي بس بلاش تطمعي مع انك تستحقي لا ال انتى عاوزه هتلاقيه وهتلاقى اكتر بكتير
ايتن بنفاذ صبر وهى تهم بالانصراف :
– لا حضرتك انا ماليش في الشغل ده..ولولا انك عميل عندنا لكنت عرفت حضرتك ازاي تتعامل كده معايا بس مش هضيع من وقتي مع واحد زيك
لم يري حمزة الا الرجل وهو يعطيها الشيك بغمزات، لكن لم يري رد فعل ايتن فهي غادرت قبل ان ينظر مرة أخرى بينما هو لم يلتفت كثيرا كان ذلك من ناحية الفضول..فشعر أنها وافقت علي عرضه
_________________________________
في اليوم التالي
في الفندق
كانت واقفة مع حمزة امام حمام السباحة في ذبك الوقت فكان خالي من بعض الناس ليتناقشا عن بعض الخطط الجديدة للعمل..
فتعثرت بكعبها وهى ترجع خطوتان للخلف، فكانت على حافة المسبح، لتشهق مفزوعة عند سقوطها في المسبح
قلق من صوت شهقتها وهو يلمحها تسقط لتتسع عيناه؛ ونزع الچاكيت وهو يركض سريعا ويقفز خلفها وفى خلال لحظة واحدة كانت يداه تحيطها بجسده؛ لتمسك بعناقه، ركز في عيناها وهي تلتمس صدره بدون قصد، لتقول بصوتها الناعم الحاد:
– انا بعرف اعوم على فكرة
همس بجانب اذنها بهدوء اربكها قليلا، ولكن سرعان ما اخفته:
– يعني كنت اسيبك تغرقي و أقف اتفرج!
هتفت بنبرة ساخطة:
– لا حنين اوي
أومأ مؤكدا:
– جداً يعني
و دون وعى منها شردت في عينيه لحظات، بينما هو يتأمل لون العسل الفاتح المختبئ بحدقتيها الواسعتين،
سحب نفسه من بين يديها ليجلس علي حافة المسبح..
وهى ما زالت تحت تأثير تأمله، لم تستطع إنكار جاذبيته الواضحة.. لكن لا نليق بالحب نحن يا سيدى ! فهو مكابر وهى لا تنحنى بسهولة
قاطع شرودها قائلا بسخرية :
-انتى هتفضلى متنحة مكانك؟ هتبردى كده!
تطلب الأمر بضعة ثوان لتستعيد فيها تجميع كلماتها، هامسة بإستفزاز:
– انا كنت دافية من شوية بس بردت دلوقت
غمز لها قبل ان يردف بوقاحة :
-ارجعلك تاني؟
اتسعت حدقتاها بإندهاش من وقاحاته، لتبرر باندفاع:
-وقح وقليل الأدب .. انا قصدي كنت دافية قبل ما أنزل البيسين .. مقصدش لما كنت قريب مني
__________________________________
في شقة منة
كانت تستمع إلى هذا المقطع من أغنية ام كلثوم بالصدفة فـ والدتها تحب سماع اغانيها، دندنت منة معها
“ياما عيون شاغلوني لكن ولا شغلوني
إلا عيونك انت دول بس اللي خدوني وبحبك أمروني”
صاحت منة بنفاذ صبر:
-يااارب نفسي احب واتحب بقي
I need man
قاطعها صوت والدتها بغضب بكلمات تهكمية:
– يااارب ارحمني منك، نفسي تكوني زي البنات العاقلة اللي بتفكر تعمل لنفسها كارير كده وبتشتغل وعندها طموحات
منة مغيرة الحوار:
– ماما انتِ كنتي عايزة حاجة؟
هتفت والدتها بحنق :
-كنت عايزاكي تروحي كارفور بعد ما تخلصي الكورس بتاعك وتجيبيلي طلبات
_________________________________
قبل ان تخرج ايتن من مكتبها لبدأ الاجتماع، لفت نظرها علي مكتب سكرتيرتها …
…………..
