في شقة ( حسان ) .. ديكورها حديث جدا بالرغم من ان العمارة في منطقة شعبية

تدخل الأم (شاهيناز) غرفة ابنتها ( نور )
شاهيناز : نور … يا نور قومي عشان تلحقي تلبسي و تفطري اخواتك
نور : خلاص بقي يا ماما هقوم اهو
شاهيناز : يلا قومي اغسلي وشك و اتوضي و صلي و صحي إسلام
نور : طيب يا ماما قومت اهو … صباح الفل يا شاهي
شاهيناز : صباح النور يا حبيبتي يلا حضري الفطار عشان مش هلحق اجهزه رايحة المستشفى بدري

************************************
حسان ( الاب ) : موظف في بنك بيحب ولاده و عاقل في بعض الأمور

شاهيناز ( الام ) : دكتورة باطنة، عصبية أحيانا ، لكن طيبة و بتحب ولادها جدا ..
خرجت نور و هي بتلم شعرها بالتوكة و بتخبط علي باب الحمام

نور : 22 سنة خريجة تربية فرنساوي ، قريبة جدا من اسلام اخوها، بتحب تساعد كل الناس باللي تقدر عليه ، بيضاء شعرها بني ملامحها رقيقة عينيها بني فاتح ..مرحة.. بتتصرف بطبيعتها مبتعرفش تتصنع

اسلام :24 سنة دخل كلية تجارة انجلش و حول في سنة تانية لأنه مرتاحش فيها و كان داخل المدرسة متأخر سنة ف حول تربية فرنساوي بعد ما نور اقنعته يدخل معاها و بقي قدها .. أقرب حد ليه نور مالوش اصحاب كتير لأنه بيعتبر نور صاحبته الوحيدة ، شعره بني غامق ، ملامحه هادية .. عينيه عسلي عنده دقن خفيفة وسيم ، مرح

عدي : 25 سنة خريج حاسبات و معلومات بيشتغل مهندس كمبيوتر في شركة عصبي في بعض الأمور .. مبيعرفش يحسبها بالعقل .. بيحسب كل الأمور بمشاعره ، شعره اسود و عينيه بني و طويل نسبيا __________________________________
خرجت نور و هي بتلم شعرها بالتوكة و بتخبط علي باب الحمام

نور : ماتيلا بقي يا عدي
عدي : حاضر يا زفتة اهدي
نور : يا عدي الحمام ده مش بتاعك لوحدك فيه بني أدمين معاك في البيت حس علي دم اهلك بقي
عدي فتح الباب
عدي :كفاية رغي رغي رغي افصلي ياختي
نور : اوعي كدا

خرجت نور من الحمام و دخلت المطبخ تحضر الفطار في نفس اللحظة عدي اخوها دخل المطبخ بيشرب و موبايله بيرن

عدي: الو .. عاملة ايه … وانتي كمان اه هقولها انهاردة و يارب بقا تقتنع ماشي هكلمك تاني سلام

نور بصوت عالي: هتفطر سيادتك ولا ايه
عدي : أيوة هفطر والنبي يا نور اكويلي القميص بتاعي ده عشان اللي انتي كويتيه فيه حتة مش نضيفة
نور : مش كفاية بتكلمني ب قرف و مستحملاك و بعملك فطار و بكويلك ليه يارب مخلقتنيش ولد
عدي قاطعها: ياريت عشان ارتاح من قرفك
نور : كدا ماشي يا عدي خليك فاكرها
عدي : يا بت بهزر معاكي انتي اللي علي طول متعصبة
نور : طيب هات القميص
عدي : حبيبتي يا نور
_____________________________________
دخل ل باباه الصالون و اخد الجرنال من علي الكنبة
عدي : بابا انا نازل الشغل
حسان ( الاب ) : ايه يا عدي مفيش صباح الخير حتي
عدي : صباح الفل يا حبيبي المهم عايزك تكلم ماما في الحوار بتاعي
حسان : حاضر يا عدي هكلمها انت يابني مش ناوي مرة تسيبلي الجرنال اقراه عايز اعرف البلد بيحصل فيها ايه
عدي: هيحصل ايه يعني يا بابا اللي بيحصل انهاردة هو اللي بيحصل بكرة هو اللي هيحصل بعده طوابير العيش زحمة .. الشباب مش لاقي شغل الحكومة بتقول كلو هيتغير و هيكون تمام.. ناس ماتت .. ناس اتقتلت .. عربيات اتقلبت .. و الاهلي كسب كالعادة
_____________________________________
في مكان آخر
في فيلا ( عمرو السعدني)
ماسك في ايديه صورة والده و والدته و بيقبلها دخلت عنده زوجته

سمر : صباح الخير يا حبيبي
عمرو : صباح النور يا سوسو
سمر بتمسك الصورة من ايديه : ربنا يرحمهم يارب
عمرو : حلمت بيهم
سمر : وانا كمان بابا و ماما وحشوني اوي مع اني مش فاكرة ماما بس كان نفسي يكونو موجودين
عمرو : يا حبيبتي مانا معاكي اهو انا كمان ماليش غيرك انتي و جوري
سمر : ربنا ميحرمناش منك يا حبيبي
عمرو بيقبلها من خدها : انا لازم انزل يا حبيبتي عشان عندي Meeting “اجتماع” مهم
سمر : ماشي يا حبيبي طب مش هتفطر
عمرو : هما جهزوا الفطار؟
سمر : اه دادة صباح جهزت كل حاجة
عمرو : ماشي هاكل حاجة بسيطة كدا
************************************
عمرو : 29 سنة مهندس مدني عنده شركة مقاولات بيحب مراته و بنته جدا ، طيب، عصبي أحيانا ناجح في شغله عنده بنت اسمها جوري ، عينيه عسلي شعره بني ،قمحي البشرة
سمر : 27 سنة زوجة عمرو جميلة و جذابة بملامح هادية شعرها بني طويل لنصف ظهرها و قمحاوية
_____________________________________
بتدخل “نور” غرفة اخوها “إسلام ” و بتشغل نغمة المنبه علي موبايلها ( يا صباح الرعب _ شركة المرعبين )
” ياصباح الرعب .. الساعه سته وعلى المقيمين خارج مدينة الرعب المحافظة على فروق التوقيت .. درجة الحرارة في الظل خمسة وعشرين وده كويس للزواحف .. و إحتمال يبقى جو هايل للكسل في السرير .. أو النوم .. أو أقولّك الأحسن؟ .. عمل تمرينات للمخوفاتيّه! “
إسلام وضع المخدة علي رأسه: اطفي البتاع ده عايز انام
نور : إسلام اصحى بقى یلا الفطار جاھز … یا إسلام اصحى بقى ..بس فالح تزن عليا اصحيك بدري عشان تنزل معايا نجيب النتيجة والنبي شكلك شايل السنادي و خايف تنزل
إسلام : بس بقا يا فقر فال الله ولا فالك انا بجيب كل سنة امتياز يا بنتي
نور : طيب يلا قوم
_____________________________________
علي تربيزة السفرة بيفطر عمرو و جوري بنته و سمر
عمرو : تسلم ايدك يا دادة كنت جعان فعلا
صباح : بالهنا و الشفا علي قلبك يا باشمهندس
عمرو : يلا انا لازم امشي عايزة حاجة يا حبيبتي
سمر : اه كنت عايزة فلوس عشان هعمل شوبينج
عمرو خرج من محفظته فلوس : اوكيه اتفضلي
سمر قبلته من خده : تسلملي يا حبيبي
____________________________________
علي الفطار
شاهيناز : ربنا ينجحكوا يا حبايبي يارب
نور : ادعيلي انت كمان يا بابا
حسان : ربنا ينجحك يا حبيبتي و يوفقك في شغل مناسب ليكي
نور : ماتكمل الدعوه یاعم الحج ولا عامل علیا
تخفیض
حسان (باباها) بيضحك و فهم قصدها: لا یا حبیبتى الشغل اھم دلوقتى ف الزمن ده وان شاء الله تتجوزي انتي و علي قريب
نور : یارب یا بابا
إسلام : ايه يا بت مستعجلة علي ايه
نور : ماهو البنت مصيرها ايه مش الجواز
إسلام : طيب يلا ياختي عشان منتاخرش

نزل إسلام و نور و وصلوا الكلية

في كلية تربية قسم فرنساوي
إسلام :ما تخلیكى جدعة و روحى شوفی النتيجة وتعالى قولیلى
نور: یا حسره ع الرجالة
إسلام : خلاص انا رایح اھو الواحد ما بیعتقش من لسانك ده
نور : استني يا إيسو جاية معاك

قرب منهم بنت صاحبة نور

شيماء : نور انتوا اتأخرتوا ليه ده النتيجة اتعلقت من بدري
نور بتوتر: بجد طب طمنيني انا نجحت ولا ايه
شيماء : مش عارفة لسة انا مستنياكوا تعالي نشوف ..
نور : يارب انجح بقي يارب انا مش عايزة أتعلم تاني خلاص

راحت نور مع إسلام يشوفوا النتيجة

نور بتوتر: بصوا انتوا كدا
اسلام: لالا بصي انتي انا مش قادر
نور :طب بصي انتي يا شيمو انا خايفة ماهو يا هنتخرج من الجامعة الرخمة دي يا هنلزق فيها
شيماء : لا انا خايفة برضو شوفي انتي
نور بتبص علي النتيجة :بسم الله الرحمن الرحيم ….
شهقت بصرخة:انا نجحت نجحت
اسلام: وانا يا نور بصي
نور بفرحة : وانت نجحت .. امتياز يا معلم
شيماء بسعادة : ايه ده وانا وانا نجحت
نور :أيوة بقا أخيرا اتخرجنا افراااج بقا ولا تقولولي مذاكرة ولا بتاع
إسلام : اه اخيرا
شيماء : مش هنتعلم تاني بقي .. كفارة يا نور

رجعت نور البيت و اسلام وصلها و خرج مع صحابه طمنت والدتها و والدها في الموبايل و في المساء

دخلت اوضتها تنام لاقت موبايلها بيرن و كان علي خطيبها
نور :مساء الورد يا علوش لسة فاكر
علي : معلش يا حبيبتي كان عندي شغل و لما روحت نمت و لسة صاحي قولت اكلمك
نور : ماشي يا حبيبي ربنا معاك
علي : المهم طمنيني.. عملتى ایه انهاردة جبتي الشهادة
نور : طب كويس انك فاكر يا حبيبي
علي : عيب عليكي ده انتي نور برضو هو انا عندي اغلي منك
نور : ايوة ثبتني ثبتني
علي : اثبتك ايه بس ده انتي اللي في القلب برضو
نور : ماشي يا علي عموما انا نجحت
علي : بجد مبروك يا حبيبتي
نور : الله يبارك فيك
علي : طب حبيبتي هاكل و اكلمك ميار بتسلم عليكي
نور : الله يسلمها هكلمها بعد ما تاكل

قفلت نور ولسة هتطفيء النور لاقت باب اوضتها بیخبط
نور: ادخلي يا ماما انا صاحیة
شاهيناز: انا كنت داخلة انام لاقيت النور فقلت تلاقیكى نمتى كالعاده وھو شغال
نور بتضحك : وتتأكدي انا متغطیة كویس وقافلة البلكونة كویس ودفیانة ولا لا
شاهيناز بیضحك: ايه ده انتى بتسمعينى شطورة حبيبة ماما ايه اللي مصحيكي بقي
نور: انا كنت بكلم علي وھنام اھو لو متصلش بيا
شاهيناز: یلا تصبحى ع خیر
نور: وانتى من اھله
_______________________________________________
في اليوم التالي
عمرو : سمر … يا سوسو انتي نايمة في مية يا حبيبتي قومي بقا عشان تلبسي جوري و تديها الحقنة
سمر : اووف بقا عايزة انام مصدعة يا عمرو
عمرو : من ايه طيب و بعدين انتي بتنامي كتير اوي
سمر: مفيش اصل اتمشيت كتير اوي مع رحمة امبارح
عمرو قرب منها و بيحضنها و هي نايمة : طب يلا بقا يا حبيبتي عشان تغيريلها هدومها و تاخد الحقنة
سمر : يا حبيبي ما تشوف دادة صباح انا عايزة انام
عمرو : حاضر يا سمر نامي يا حبيبتي نامي
سمر : عمرو بليز قول ل صباح تعملي النسكافيه بتاعي
عمرو : ماشي

بعد ما عمرو نزل

سمر بتتصل ب رقم متسجل ( رحمة )
سمر : الو
…. : ايه يا قلبي وحشتيني
سمر بتضحك بدلع: وانت كمان وحشتني اوي يا حسام
حسام : بقولك ايه يا قلبي كنت محتاج كدا 2000 جنيه ضروري
سمر : حاضر يا حبيبي هاخدهم من عمرو و هو رايح الشغل
حسام : طب ما تخليهم 3000 ماهو علي قلب امه قد كدا برضو
سمر : حاضر يا روحي
حسام : طب ايه الزفت ده هينزل امتي وحشتيني و عايز اكلمك براحتنا
سمر : هيفطر و هينزل اهو
_____________________________________
دخل المطبخ فتح الثلاجة خرج منها حقنة الانسولين سرح فيها لحظات بحزن و دخل عند بنته كانت قاعدة في الريسبشن و بتتفرج علي Tv لكن سرحانة قرب منها بهدوء و قبلها من خدها

عمرو : بتعملي ايه يا جوري
جوري: قاعدة بفكر
عمرو رفع احدي حاجبيه : بتفكري بتفكري في ايه بقا
جوري : ولا حاكة ( حاجة )
عمرو : ولا حاكة خالص
جوري هزت رأسها : أيوة يا بابي .. هي مامي فين
عمرو : مامي نايمة و بعدين سيبك من مامي دلوقتي يلا عشان تاخدي الحقنة بقا
جوري بملامح غضب : طيب
عمرو حاول يغير مزاجهها وقرصها من خدودها بحنية : يلا اهو مش هنحس بحاجة خالص خالص هييييح اخدناها

دخل الحقنة في رجلها و وضعها جنبها
جوري : هو انا امتي بقا هخف يا بابي و ابطل اخد الحقن دي
عمرو بيحاول يتماسك : قريب يا حبيبتي هتخفي و هتكوني بخير
جوري : طيب امتي مش هتمنعني اكل شوكليت و حلويات و ايس كريم زي كل صحابي في الكلاس اشمعنا هما بياكلوا كل حاجة
عمرو بيحاول يكتم دموعه تنزل : انا جعان اوي يا جوري عايز اكل يلا قومي عشان تغيري هدومك علي ما اقول ل دادة صباح تجهز الفطار
جوري : اوكيه
عمرو : استني
جوري بصتله تاني : ايه
عمرو : هاتي بوسة
جوري قبلته من خده و هو بيحضنها

عمرو دخل المطبخ كانت صباح بتحضر الفطار

عمرو : صباح
صباح : نعم يا باشمنهدس
عمرو : جهزي الفطار عشان جوري لسة اخدة حقنة الانسولين
صباح : حاضر من عينيا انا قربت اهو
عمرو : اه صحيح نسيت اطلعي غيريلها هدومها و انا هكمل الفطار ليها
صباح :لا ميصحش انا اسفة اني اتأخرت
عمرو : لا طبعا متقوليش كدا عادي اهو تغيير يلا بقا اطلعي قبل ما تقلب الدولاب كلو

جهز قهوته المظبوطة و بيعمل نسكافيه و ساندويتشات في صينية و طلع بيهم غرفة سمر

عمرو : سمورة …. سوسو انا جبتلك النسكافيه بتاعك
سمر بتتمطع : ايه ده معقولة بنفسك
بيقبلها من شفايفها : متاخديش علي كدا بس هي مرة
سمر : ربنا يخليك ليا يا حبيبي
عمرو : يلا يا حياتي افطري و اشربي النسكافيه بتاعك لاني نازل الشغل
سمر : ماشي يا روحي بس بشرط تأكل معايا
عمرو : اكيد طبعا
سمر بتاكله بايديها
عمرو : ده ايه الدلع ده بس
سمر : حبيبي هو ممكن طلب
عمرو : ايه ي حبيبتي
سمر : هو ممكن يعني عايزة منك 3000 جنيه
عمرو باستغراب : مش انتي لسة اخدة امبارح 1500
سمر بدلع: يا حبيبي فيه دريس “فستان” عجبني عايزة أجيبه ل رحمة ما انت عارف هي جابتلي واحد قبل كدا
عمرو : بس بصراحة بتاعها مكنش غالي كدا ده تقريبا ميجيش 500 جنيه
سمر بلخبطة: لالا ده ب 3000 ده انا كنت معاها و هي بتجيبهولي
عمرو :بس كدا حاضر هسيبلك فلوس قبل ما انزل
سمر و هي بتحضنه: يا حبيبي ربنا يخليك ليا
__________________________________________________________________
سمر دخلت عمارة من شكلها باين أنها قديمة في حارة شعبية فتحت باب الشقة بالمفتاح و دخلت اوضة النوم كان نايم علي السرير

سمر :يا حوس حبيبي اصحي
حسام : سمورتي وحشتيني
سمر بتقبله من شفايفه: وحشتني اوي يا حوس
حسام بيشدها تنام جنبه : وانتي كمان وحشتيني اوي الزفت بتاعك ده خرج
سمر : أيوة اول ما راح الشغل ع طول جيتلك

لاحظت أنه متضايق
سمر : مالك يا حبيبي شكلك متضايق
حسام : اعملك ايه يعني مش كفاية بتنامي في حضن راجل غيري و مستحمل قولتلك اتطلقي منه بقا و خلصينا
سمر : يا حبيبي مانا مش عايزة اتطلق منه حرام عليك يا حسام ده انا كل شهر باخد منه اكتر من 15 الف ولا 10 الاف وانت تقولي اتطلق
حسام : ما هو ع قلبه اد كدا ياختي المهم بقا فكري في حل كدا خلينا نخلص
سمر : اعمل ايه يعني يا حسام
حسام : اتطلقي بس قبلها نطلع منه ب قرشين حلوين كدا
سمر : ماهو المؤخر بتاعي مش كبير ده مبلغ تافه
حسام : اوف طب و بعدين
سمر : ده غبي جدا بيضيع فلوسه ع الفاضي ع الأعمال الخيرية و الحاجات دي يا حسام ده فيه صفقة معروضة عليه هياخد منها مبلغ كبير جدا و الغبي رفض قال ايه فلوسهم حرام و صفقاتهم مشبوهة و مش عايز يتعاقد معاهم
حسام : مالو الغبي ده
سمر : مش عارفة بقي سيبك منه خلينا مع بعض دلوقتي
حسام : لا استني بس ركزي معايا كدا معاكي رقم الراجل اللي عايز يشاركه ده
سمر : حسام بتفكر في ايه
حسام : هقولك
____________________________________
تاني يوم راحت سمر من ورا عمرو شركة عدوه و منافسه اللي حابب يعمل معاه صفقة دخلت قابلته في الشركة و طلبت تتكلم معاه

هاني : اهلا خير حضرتك
سمر : مبدئيا بلاش عمرو يعرف بالمقابلة دي
هاني ساب الملف اللي في ايديه و بصلها : اشمعنا
سمر : مستر هاني حضرتك انا عرفت في الفترة الأخيرة ان حضرتك عايز تكون شريك مع عمرو و تعملوا مشروع و صفقات مع بعض و هو رفض بحجة انك بتشتغل شغل مشبوه و مش مطمنلك
هاني : مظبوط
سمر : و اللي يقنعهولك يوافق
هاني قرب منها : ده انا ابوسه
سمر : هههههه لا البوسة دي مش بفلوس انا عايزة حاجة تاني
هاني : المبلغ اللي تختاريه
سمر : 500 ألف جنيه
هاني : موافق طبعا
سمر :يبقي اتفقنا
____________________________________
في المساء
سمر : حبيبي هو انت ليه مش ناوي تشارك هاني ده ده حتي الصفقة دي باين عليها عالية و أرباحها جامدة
عمرو باستغراب : دي اول مرة تقولي رايك في شغلي
سمر : يا حبيبي مانا لما بسمعك بتكلمه كتير و ترفض صعب عليا قولت اقولك رأيي
عمرو : ميصعبش عليكي غالي يا حياتي الراجل ده يا حبيبي صفقاته مشبوهة اصلا و بيتاجر في المخدرات بس من تحت لتحت كدا و بيدخلهم مع الصفقات دي يعني الشغل ده وهمي اصلا للشغل الأصلي اللي هو المخدرات
سمر : ايه ده معقولة
عمرو : اه ولله
سمر : عشان كدا انت رافض تشاركه
عمرو : بالظبط
____________________________________
مر شهرين و كان قبل الدراسة ب يومين
في كلية تربية
في مكتب العميد
العميد : للاسف مفيش تعيينات يا إسلام
إسلام : نعم ازاي و زميلي اتعين ازاي حضرتك انا طالع الأول علي دفعتي مع مرتبة الشرف يبقي من حقي اتعين معيد في كليتي ازاي حضرتك ترفض انا عايز افهم انا عملت ايه مذاكرة و ذاكرت 4 سنين و تعبت و بطلع كل سنة الأول ع الدفعة
العميد:يا إسلام انا مرفضتش انا بس أجلت طلبك شوية
_____________________________________
رجع عمرو من الشغل و لاحظت أنه متضايق
سمر : مالك يا حبيبي متضايق ليه
عمرو : مفيش يا حبيبتي بس بهاء تعبان جدا و محتاج يعمل عملية ضروري بعد يومين
و طبعا مينفعش حد يسافر معاه غيري و كنت متفق مع الدكتور علي اساس يعمل العملية بعد شهر لاني كنت مرتب كل حاجة علي أساس كدا
سمر : طب هيقعد كام يوم
عمرو : يعني اسبوع علي ما الحالة تستقر
سمر :طب خلاص يا حبيبي سافر الاسبوع ده و متقلقش من حاجة
عمرو : ازاي بس يا حبيبتي انا عندي ورق مهم محتاج يتمضي و للأسف مش هقدر أمن حد عليه
سمر: وانا موجودة
عمرو باستغراب : لا طبعا انتي مش هتفهمي حاجة في شغلي يا سمر
سمر : يا حبيبي ما انت هتبقي مسافر و مين هيدير الشغل غير حد بتثق فيه زيي كدا عشان كدا ده أنسب حل و غير كدا انا مش هعمل حاجة الورق اللي محتاج امضتك هتصل بيك و تقولي امضي عليه و خلاص
عمرو : عندك حق و اهو كلها اسبوع كدا كدا
سمر بدلع:تمام دلوقتي بقا نروح عشان تعملي توكيل رسمي منك بالتحكم في كل املاكك عشان اقوم بدورك وانت مش موجود بس انت هتوحشني اوي يا عمرو معقولة اسبوع من غير ما اشوفك
عمرو : وانا ولله بس ان شاء الله هيعدي بسرعة و بهاء يقوم بالسلامة
سمر : انا مستغربة بجد انت بتضيع في فلوسنا ع الفاضي
عمرو : فاضي ايه بس انتي عارفة الولد ده انا بحبه اد ايه و ابوه الله يرحمه كان غالي عليا جدا و هو مالوش حد غيري هيعمله العملية من بعد موت ابوه و امه
سمر : لا ليه عمو طبعا موجود
عمرو : انتي مش عارفة عمو ده مستحيل يعملو العملية دي ده حتي التبرعات اللي لمها من الناس صرفها لنفسه عشان كدا مش هستني يعمل حاجة
سمر : طيب يا حبيبي اللي انت شايفه بس مش تفرتك الفلوس ع الفاضي كتير
_____________________________________
سمر اتصلت علي حسام و حكتله كل اللي حصل

حسام : الله عليكي يا سمورة لا بتفهمي ولله
سمر : انا معرفش قولت كدا ازاي بس قولت الفرصة جات لحد عندنا
حسام : طبعا انا بجد مبسوط بذكاءك ده يا روحي المهم هيسافر امتي
سمر : بعد بكرة
حسام : اخيرا بقا

و هي بتتكلم في الموبايل الباب اتفتح مرة واحدة و سمر اتخضت ان اللي علي الباب سمع كل حاجة

 حد سمع سمر و هي بتكلم حسام؟